Bi armanca şermezarkirina êrîşên çeteyên DAIŞ ên li hember Kobanê li bajarê Elmanya yê Erfurt çalakiyek hat lidarxistin.  Di meşa li ser banga NAV-DEM Thurîngen zêdetirî  300 kesî beşdar bûn.

Kurdistanî û dostên wan ên ji her deverên Eyaleta Elmanya hatin bi armanca piştgiriya bi Kobanê re li navenda Erfurt meşiyan.  Kesên bênavber bi dirûşmayan meşiyan pankart û dowîzên hovîtiya çeteyên DAIŞ vedibêjin hilgirtin û bi sedan belavok belav kirin.

Xwepêşanderan durûtiya koalîsyona navneteweyî ya li hember DAIŞ hatiye avakirin rexne kirin û xwestin qedexeya li hember PKK’ê rabe.

Di meşê de ji Yekîtiya Piştevaniya Civakî ya Erfurt Marîanne Kroger û ji Partiya Keskan endama Meclîsa Eyaleta  Thurîngen Madeleîne Henflîg axivîn. Marîanne Kroger behsa alîkariya ji bo nexweşxaneya Kobanê û girîngiya NAV-DEM kir. Madeleîne Henflîg jî xwest zextên li hember dewleta Tirk a destekê dide DAIŞ bên zêdekirin.

Xwepêşanderan dema di navenda bajêr Anger derbas bûn, li nuqteya ku xetên tramvayê digihêjin hev çalakiya rûniştinê ya 5 deqeyan pêk anîn. Di çalakiyê de ku trafîk kilîd bû, xwepêşanderan bal kişandin ser rewşa dawî ya li Kobanê û Rojava. Xwepêşander paşê heta avahiya Serokwezîrtiya Eyaleta Thurîngen meşiyan. Xwepêşandan li vir bi axaftin, dirûşm û tilîliyan bi dawî bû.

Çavlirê ye çalakî û xwepêşandanên li Erfurtê ji bo Kobanê tên lidarxistin heta roja Duşêmê bidomin.