Piştî deqeyeke rêzgirtinê ya ji bo bîranîna şehîdên şoreşê û Kurdistanê, dîwana kongreyê hate avakirin û Hevserokê Kongreya Neteweyî ya Kurdistanê (KNK) Rebwar Reşîd axivî.

Reşîd serketin ji kongreyê re xwest û li ser girîngiya rêxisitnbûna Kurdên li Anatoliya Navîn rawestiya. Reşîd destnîşan kir ku weke KNK'ê ew ê bi her awayî piştgiriyê bidin rêxistinbûna Kurdên Anatoliya Navîn.

Hevseroka Kongreya Civaka Demokratîk a Kurdistaniyên li Ewropayê (KCDK-E) Fatoş Goksûngûr jî işaret bi êrîşên dewleta Tirk ên li dijî gelê Kurd, hêzên şoreşger û demokratîk kir û got, li her qadê pêwîstî bi rêxistinbûn û berxwedanê heye. Goksûngûr diyar kir, ku Kurdên ji Anatoliya Navîn jî divê xwe li her welatî bi rêxistin bikin û bi awayekî çalak cihê xwe di nava têkoşîna dijî dewleta Tirk de bigire.

Piştre raporên kar û malî hatin xwestin, rexne û pêşniyar hatin kirin. 

Di kongreyê de, ji bo rêxistinbûn hê bi xurtî bê kirin û girseyên gel bigire nava xwe, di rêziknameyê de guhertin hate kirin. Biryar hate dayin ku li welatên Kurdên Anatoliya Navîn lê dijîn, meclîs werin birêxistinkirin. Biryar hat girtin ku hevserok û nûnerên meclîsan bibin delegeyên xwezayî yên kongreya Ewropayê.

Ji bo rêveberiya platformê 12 endamên nû ji Elmanya, Awûstûrya, Swîsre, Hollanda, Swêd û Norwêcê hatin hilbijartin. Ji Elmanyayê Melîha Dogan û ji Swêdê jî Kadîr Çelîk ji bo hevserokatiya PKAN'ê hatin hilbijartin.

Kongre bi stranên hunermendên Kurd ên ji Anatoliya Navîn qediya.