Belgefîlma “Vejîna Kurd” a ku li ser dîroka berxwedana gelê Kurd hatiye kişandin li ser medyaya dîjîtal hat weşandin. Belgefîlm piştî hate weşandin rastî êrîş û astengiyên cuda hat.

Platforma YouTube hesabê fermî yê belgefîlmê bi hinceta "binpêkirina polîtîkayên rêxistinên sûc ên tundûtûj" girt û gihîştina naveroka belgefîlmê asteng kir. Astengkirina belgefîlmê rastî bertekan hat.

Komîna Dokumantera Şehîd Gulistan TARA derbarê astengkirina belgefîlmê de daxuyanî da û ev tişt parve kir: 

"Belgefîlma me ya navê "Vejîna Kurd" ji roja ku dest bi weşana xwe li ser medyaya dîjîtal kir ve rastî gelek êrîş û astengiyên dewleta Tirk hatiye.  Herî dawî, îro hesabê me yê YouTube ji ber qaşo "binpêkirina polîtîkayên rêxistinên sûc ên tundûtûj" hate girtin. Erka belgefîlmekê; vegotina şahidên serdemê, belge û dîmenên pêvajoyên dîrokî wekî sûc hatine hesibandin. Ji ber vê yekê, şêwaza vegotina me ya objektîf û dîrokî ya rast hatiye astengkirin.

Tevî van hemû astengiyan jî temaşevan û şopînerên me dikarin belgefîlma me piştî weşana wê li ser Sterk TV û Medya Haber TV li ser kanala me ya telegramê (https://t.me/taradokumanter) temaşe bikin. Her wiha, ji bo temaşe kirina beşên dokumantera me, malpera me ya Komîna Dokumanter a Şehîd Gulistan TARA wê di demek nêzîk de amade be.

Kanala me ya Telegramê
https://t.me/taradokumanter.”