Di destpêka festîvalê de Parlamenterê Parlamenta Ewropayê Patrîck L'Hyarîc axivî û diyar kir, Tirkiye bi rêveberiya Erdogan ve ber bi rejîmeke dîktatorî ve diçe. 

L'Hyarîc da xuyakirin, ku girtina nûnerên gel, akademîsyen û rojnamevanan tê wateya têkçûna demokrasiyê û got, "Ev pêkanînên faşîzan, darbeyek li hemberî Kurdan û demokratan e. Em destekê didin têkoşîna jin û ciwanên Kurd ên li Rojava li dijî barbarên DAIŞ'ê dimeşînin û em têkoşîna wan weke têkoşîna xwe dibînin."

Patrîck L'Hyarîc diyar kir, divê Rêberê Gelê Kurd Abdullah Ocalan azad bibe, PKK ji lîsteya 'rêxistinên terorê' were derxistin û destnîşan kir, ku ew ê her tim li cem dostên xwe yên Kurd bin.

Di Fete de l'Humanîte de, ku bi panel û aktîvîteyên cihêreng dewam dike, Komeleya France-Kurdistan jî bi sernavê 'Stop Erdogan' kampanyayek da destpêkirin.

PANELA LI SER ROJAVA Û BAKURÊ KURDISTANÊ

Li standa France Kurdistan, panelek li ser mijara rewşa Bakur û Rojavayê Kuridstanê hat lidarxistin. Parlamenterê HDP'ê yê Şirnexê Faysal Sariyildiz, Nûnerê PYD'ê yê Fransayê Xalid Îsa, Nûnerê HDP'ê yê Ewropayê Farûk Dorû û Berpirsyara Têkiliyên Derve ya Partiya Komunîst a Fransayê Lydîa Samarbahksh weke qiseker beşdarî panelê bûn.

Sariyildiz qala wehşeta dewleta Tirk a li Cizîrê kir û got, "Di 79 rojên berxwedana Cizîrê de 270 însan bi hovane hatin qetilkirin, ku di nava wan de xwendekarên zanîngehê, hunermend û rojnamevan jî hebûn. Li Bakurê Kurdistanê zêdeyî 10 bajar bi tank û topan hat rûxandin û li komkujî li van deran hatin kirin."

Samarbahksh jî diyar kir, ew destekê didin kampanya 'Stop Erdogan' a ji aliyê Komeleya France Kurdistan ve hatiye destpêkirin û got, ew ê ji hikûmeta Fransayê bixwazin ku helwestê li dijî feraseta dîktator û despot a Erdogan nîşan bide. Samarbahksh got, "Erdogan ji bo demokratên li Kurdistan û Tirkiyeyê dijîn, xeteriyeke gelekî mezin e."

Di festîvalê de li konê Kurdistanê pankarta bi nivîsa 'Ji Ocalan re Azadî' hat daliqandin û bi pêşengiya Ciwanên Azad Parîs, meşek li qada festîvalê hat lidarxistin. Ciwanan wêneyên Ocalan hildan û dirûşmên "Ji Ocalan re azadî", "Bê Serok jiyan nabe" qîriyan.

Her wiha hunermend û koma govendê ya TEV-ÇAND Parîsê li vir hunera xwe pêşkêş kir.