Di 90. salvegera wê de akademîsyen û siyasetmedar li ser bingeha gengeşeyên li Tirkiye û Rojhilata Navîn wê Peymana Lozanê nîqaş bikin.

Li bajarê Lausanne (Lozan) ê Fransa ku Peymana Lozanê lê hat îmzekirin hejmarek zêde ya akademîsyen, rojnemevan û siyasetmedar di 90. Salvegera peymanê de li ser esasê gengeşeyên li Rojhilata Navîn û Tirkiyeyê wê Peymana Lozanê nîqaş bikin. Di konferansa ji aliyê Komeleya Parastina Mîrasa Kurd a Îsmet Şerîf Vanli ve tê organîzekirin û Şaredariya Lozanê malavaniyê jêre dike wê ji Tirkiye, Fransa û Swîsreyê axaftvan beşdar bibin. Di konferansa ku bi navê  “Li Rojhilata Navîn û Tirkiyeyê di pêvajoya veguhertinê de 90. Salvegera Lozanê” were lidarxistin de Alîkarê Şaredarê Şaredariya Lozanê Oscar Tosato, Parlamenterê Parlamentoya Federal a Partiya Sosyalîst Eric Voruz, Parlamenterê BDP’ê yê Amedê Altan Tan, ji Enstîtuya Zanistên Civakî ya  Parîs Doç. Hamît Bozarslan, Hîndekarê Zanîngeha Enqere û Nivîskar Pr.  Mithat Sancar, ji Enstituya Pêwendiyên Navneteweyî ya Zanîngeha Cenevre  Pr. Jordi Tejel Gorgas û Serokê Koma Partiya Sosyalîst a Parlamentoya Vaud Kanton Nicolas Rochat wê biaxivin.

EM Ê SERHILDANA LI HEMBERÎ BÊEDALETIYÊ LÊKOLÎN BIKIN

Serokê Komeleya Parastina Mîrasa Kurd a Îsmet Şerîf Vanli, Îhsan Kurt destnîşan kir ku lidarxistina  vê konferansê ji ber di 90. Salvegera Peymana Lozanê de û her wiha ku li Rojhilata Navîn û Tirkiyeyê guhertin û veguhertin di rojevê de ne pirr girîng e û da xuyakirin ku wê konferans serhildana Kurdan a li hemberî bêdaletiyê, dîroka komkujiyên dewleta Tirk di aliyê dîrokî, huqûqî û civakî de careke din ji her alî ve lêkolîn bike.

Konferans di 22’ê  Hezîrana  2013’an saet  13.30’da li Salona Parlamentoya Bajêr a Lozanê dest pê bike.