Li navçeya Tambovê ya Rûsyayê, di 15'ê Tebaxa 2020'an de Festîvala Neteweyan hate lidarxistin.

Kurdên li herêmê jî bi rengekî xurt tevlî festîvalê bûn û ji ber tevkariya xwe ya li jiyana herêmê hêjayî xelatê hatin dîtin.

Festîvala ku bi rengekî kevneşop tê lidarxistin, îsal bi beşdariya komên govendê û muzîkê yên ji neteweyên Kurd, Kazax, Ermen, Qereçî, Rûs û Tatar pêk hat.

Bi navê Kurdan koma muzîkê û govendê Koma Barîn û hunermend Elnaz Kasimova hunera xwe pêşkêş kirin.

Laçîn Îbragîmova li ser navê Kurdên li herêmê di festîvalê de axivî û têkildarî çand û kevneşopiya gelê Kurd agahî bi beşdaran re parve kir.

Di dawiya festîvalê de xelat li beşdaran hate belavkirin.