Li bajarokê Heûsden-Zolder ê li herêma Lîmboûrg a Belçîkayê, Kurdên ku piraniya wan ji Rojava ne, duh rastî êrîşa bi sedan nijadperestên AKP-MHP'yî hatin. Bi dehan kesên xwe li maleke girtin, gefa şewitandinê li wan hat xwarin. Di encama êrîşê de gelek kes birîndar bûn ku rewşa yekî ji wan giran e.

Bi sedan Kurdistanî û dostên wan ên ji deverên cuda yên Ewropayê li pêşiya Parlementoya Ewropayê ya li Brukselê kom bûn. 

Di çalakiya protestoyê ya li Qada Luksembûrgê hate lidarxistin de gelek caran dirûşmên mîna "Tolhildan", "Faşîst Erdogan" û "Dîktator Erdogan" hatin berzkirin. Di çalakiyê de ji xeynî alên PKK, PJAK û KJAR'ê posterên Rêberê Gelê Kurd Abdullah Ocalan hatin hildan. Di çalakiyê de her wiha posterê mezin ê Abdullah Ocalan û ala PKK'ê jî bal kişand.

Daxuyaniya ku ji aliyê Konseya Demokratîk a Civaka Kurdistaniyên li Belçîkayê (NAV-BEL) ve hat amadekirin, hat xwendin. Di daxuyaniyê de hat destnîşan kirin ku ev êrîş ji polîtîkayên dij-Kurdan ên dewleta Tirk ne serbixwe ne û hate diyarkirin ku êrîş li dijî malbatên ku ji pîrozbahiya Newrozê vedigeriyan bi dengê Tekbîrê pêk hatiye û gefa şewitandinê hatiye xwarin.

Di daxuyaniyê de hat gotin ku di êrîşê de 7 Kurd birîndar bûne û yek ji wan agahî jê nayê girtin û ev tişt hat gotin, "Ev ne êrîşa yekemîn e û wiha xuya dike ku wê ne ya dawî be.”

Di daxuyaniyê de bang li rayedarên Belçîkayê hat kirin ku ewlekariya Kurdan misoger bikin û zextê li dewleta Tirk bikin ku hurmetê nîşanî qanûn û wekheviyê bide.

Hevseroka KCDK-E Zubeyde Zûmrût, jî da xuyakirin ku ev êrîş di demeke ku pêngava 10'ê Cotmehê ya ji bo azadiya Rêberê Gelê Kurd Abdullah Ocalan û mezinkirina pêngava çareseriya pirsgirêka Kurd pêş ketiye de pêk hatiye û got, "Dixwazin vê pêngavê di bin siya faşîzmê de bihêlin.”

Nûnera PYD'ê ya Ewropayê Mizgîn Ehmed jî got, "Ev êrîş û êrîşên di 19'ê Adarê de hatin kirin ne êrîşên li hemberî malbatekê ne, li dijî doza gelê Kurd in."

Mizgîn Ehmed wiha dom kir: "Her ku doza gelê Kurd mezin dibe, her ku yekîtiya neteweyî xurt dibe, her ku gelê me xurt dibe, dijminê me hîn zêdetir har dibe û êrîşî gelê me dike." 

Di dema çalakiya protestoyî de bi polîsan re gelek caran rageşî rû da. Li alyek polîsan li hemberî xwepêşandêran gaza rondikrêj bi kar anî û li aliyê din TOMA û polîsên çevîk li qada protestoyê hatin bicihkirin. Organîzator gelek caran ji bo tengezarî rû nede neçar man mudaxle bikin.