Bi sedan welatiyên Tebqayî, Tevgera Ciwanên Şoreşger, Yekitiya Jinên Ciwan, saziyên sivîl, Partiya Pêşerojê ya Sûriyeyê û endamên Civata Jinan a Zenûbyayê, ji bo şermezarkirina êrîşên dewleta Tirk ên bi çekên kîmyewî, li Taxa Bîrîncî ya li bakurê Tebqayê li hev civiyan û meşeyeke û bi meşaleyî meşiyan. Ciwan û gel, ji Taxa Bîrîncî heta Çerxerêya Meyselûnê meşiyan.

Endama Yekitiya Jinên Ciwan Îslam Ebas, daxuyanî xwend. Di daxuyaniyê de hat diyarkirin ku di kirina sûcan de dewleta Tirk sînornenas e; ne bi tenê sivîl, zarok qetil kirine û bajarên ewle topbaran kirine, herî dawî bi bikaranîna çekên kîmyewî ji aliyê dewleta Tirk ve, 17 gerîlayên HPG`ê şehîd bûn.

Di daxuyaniyê de hat destnîşankirin ku dewleta Tirk ev sûc li pêş cîhanê û civata navneteweyî pêk anî ku dema bibihîze li cem dewletekê çekên kîmyawî hene artêşan dike nav liv û tevgerê û wan dorpêç dike.

Di daxuyaniyê de hat piştrastkirin ku civata navneteweyî, sûcên dewleta Tirk a dagirker û bikaranîna wê ya çekên kîmyewî û qedexekirî paşguh dike.

Di daxuyaniyê de bang li gelên cîhanê hat kirin ku zextê li hikûmetên xwe bikin da ku helwesteke cidî li dijî dewleta Tirk nîşan bidin û daxwaza qedexekirina bikaranîna çekên kîmyewî ji rêxistinê kir û jê xwest ku li ber vî sûcî rabibe û hesab ji Tirkiyeyê bixwaze. 

Di dawiya daxuyaniyê de wiha hat gotin: “Em ji hemû cîhanê re dibêjin ku divê dewleta Tirk û pergala xwe ya faşîst bê hesab nemîne û em ê bi tundî bersiva wê bidin. Em, hêzê ji şehîdên xwe digirin.”