Bi 4’emîn salvegera dagirkirina Serêkaniyê ji aliyê dewleta Tirk a dagirker ve, bi hezaran koçberên Serêkaniyê li kampa Weşûkanî xwepêşandan li dar xist.

Xwepêşandan ji pêşiya dibistana kampê dest pê kir û heta konê ku ji bo şermezarkirina dewleta Tirk a dagirker hatiye vedan, meşiyan.

Li vir endama Rêveberiya Kampa Weşûkanî Sûriye Mihemed axivî û got: “Dewleta Tirk a dagirker û çeteyên wê 4 sal in war û malên ma dagirkirin e. Hemû dewletên cîhanê yên ku li hember êrîş û sûcên dewleta Tirk ên li ser Bakur û Rojhilatê Sûriyeyê bêdeng in, şirîk in."

Sûriye Mihemed destnîşan kir ku vegera Serêkaniyê tenê bi dawî lê anîna dagirkeriya dewleta Tirk pêkan e û bang li civata navneteweyî kir ku sûcên dewleta Tirk a dagirker ên li dijî herêmê rawestîne.

Piştî axaftinan sînevîzyon hat pêşandan.

Di heman çarçoveyê de, koçberên Serêkaniyê li kampa Serêkaniyê ya li rojhilatê Hesekê xwepêşandanek li dar xist.