Bi sedan şêniyên bajarê Helebê vê sibehê li pêşiya Nexweşxaneya Şehîd Xalid Fecir a li taxa Şêxmeqsûd kom bûn û cenazeyê şehîd Şervan Dîgor wergirtin ê ku di qonaxa duyemîn a Berxwedana Serdemê de şehîd bûbû.

Li goristana şehîdan, merasîma veşartinê bi bîranîna cangoriyên azadiyê dest pê kir. Endama Meclisa Malbatên Şehîdan Emine Xidir û bavê şehîd Şervan, Mihemed Bekir axivîn.

Emine Xidir di destpêka axaftina xwe de şehîdên azadiyê bi bîr anî û sersaxî ji malbata şehîd Şervan re xwest.

Bavê şehîd Şervan serbilindiya xwe bi fedakariyên di oxira rizgariya Efrînê de anî ziman û diyar kir ku ji bo rizgariya axa wan, ew can û zarokên xwe feda dikin.

Piştre wesîqeta şehîd Şervan hat xwendin û cenazeyê şehîd Şervan di nava dirûşmên dilsoziya bi şehîdan re û rizgarkirina Efrînê ji artêşa Tirk û çeteyên wê, hate veşartin.