Şervanê Hêzên Sûriyeya Demokratîk (QSD) Mihemed Feysel (Dijwar) 27'ê Tîrmehê di qezaya perwerdehiyê de bû şehîd.

Şêniyên navçeya Tirbespiyê cenazeyê şehîd Mihemed Feysel bi merasîmekê li Şehîdgeha Şehîd Dilşêr veşart. 

Li şehîdgehê endamê Meclisa Malbatên Şehîdan a Tirbespiyê Mihemed Îbrahîm axivî û sersaxî ji malbata şehîd re xwest.

Îbrahîm soza dewamkirina li têkoşînê da û anî ziman ku bi saya fedakariyên şehîdan hevgirtina gelê Bakur û Rojhilatê Sûriyeyê xurt bûye.

Di meresimê de endamê Nivîsgeha Têkiliyan a Meclisa Leşkerî ya Qamişloyê Mihemed Zêdan got: “Wekî hêzên leşkerî me soza parastina herêmên Bakur û Rojhilatê Sûriyeyê daye, berdêl çi qas giran be jî em bi sozê ve girêdayî ne heta ku ewlehî û aramî li herêmê pêk werin.”

Bi navê malbata şehîd Mihemed Feysel, apê wî Inad Xelef jî bal bir ser fedakariya şehîd Mihemed a ji bo jiyaneke azad û birûmet û got: "Em bi şehadeta wî serbilind in."

Piştî axaftinan, wesîqeya şehadetê ya şehîd Mihemed Feysel hat xwendin û radestê malbata wî hat kirin. Gava veşartina cenazeyê şehîd, dayikan tilîlî kirin.