Meclîsa Kongreya Star a navçeya Til Birakê ya kantona Qamişloyê ji bo şermezarkirina şewitandina Girtîgeha Evînê ya Tehranê meşek lidar xist. Bi dehan şênî tevlî meşê bûn û bang li hêzên navneteweyî kirin, ku erkên xwe pêk bînin û kiryarên dermirovî yên dewleta Îranê yên li dijî gelan rawestînin.

Meş ji çerxerêya Firinê ya başûrê navçeyê destpê kir. Di meşê de wêneyên Rêberê Gelê Kurd Abdullah Ocalan û Jîna Emîn hatin hildan. Her wiha diruşmeyên "Jin, Jiyan, Azadî" û "Na ji dîktatoriyê re" hatin berzkirin.

Meş li çerxerêya Şehîdan a naverasta navçeyê sekinî. Li vir ji bo bîranîna şehîdên azadiyê deqeyeke rêz hate girtin. Piştre endama rêveber a Kongreya Star a Til Birakê Alya El Iwês axivî, qetilkirina Jîna Emînî û tundiya li ser jinan şermezar kir.

Alya El Iwês diyar kir ku piştî çend hefteyan di ser qetilkirina Jîna Emînî re rejîma Îranê bi rêbazeke hovane Girtîgeha Evîn şewitand û wiha domand: "Ev rêbaz dewama siyasetên desthilata dîktator e ku tirs û xofê belav bike û hegemoniya xwe ferz bike."

Alya El Iwês bang li hêzên navneteweyî kir ku erkên xwe bi cih bînin û kiryarên hovane yên li dijî mirovahiyê rawestînin.

Çalakî bi berzkirina diruşmeyan bi dawî bû.