Li gorî ajanseke nûçeyan a nêzî hikumeta Şamê, ku agahiyên xwe dispêre çavkaniyekî leşkerî, Îsraîlê ji aliyê herêma Colan a dagirkirî vê sibehê êrîşeke hewayî bir ser hin nuqteyên li başûr rojavayê Şamê.

Hate ragihandin ku di êrîşê de leşkerek bi giranî birîndar bû û zirarên madî li herêmê bûn.

Li gorî heman ajansê pergala parastina hewayî jî bersiv da êrîşa bi roketan û gelek jê xistin xwarê.

Navenda Çavdêriya Mafên Mirovan a Sûriyeyê (SOHR) jî piştrast kir ku Îsraîlê êrîş kiriye.

SOHR'ê diyar kir ku êrîş li derdora Balafirgeha Navneteweyî ya Şamê, herêma Keswê ya li başûr rojavayê Şamê pêk hatiye û depoyên komên alîgirên Îranê hatine bombekirin.

Li gorî SOHR'ê, hedefên ku hatin bombekirin hatin rûxandin û di encamê de birîndar hene ku yek ji wan endamê hêzên hikumeta Şamê ye.

Her wiha diyar kir ku ji komên alîgirê Îranê jî kuştî hene.