Piştî daxuyaniyên Wezîrê Karên Derve yê Tirk Hakan Fîdan ku Bakur û Rojhilatê Sûriyeyê hedef digre, êrîşên li ser herêmê her ku diçe zêde dibin.

Dewleta Tirk a dagirker êrîşî gundê Merenaz a Şerayê û herêmê di navbera gundên Dêr Cemal û Ziyara yên navçeya Şêrewa kir.

ÊRÎŞA BI SER HÊZÊN ŞAMÊ

Balafirên bêmirov a biçek êrîşî dibistana gundê Dad Ebdal ê Zîrganê kir. Her wiha li gundên El Bube û El Esadiye yên Zîrganê êrîşî nuqteyên hêzên hikûmeta Şamê kirin. Di êrîşan de ziyanên madî çêbûn.

ELEKTÎRÎK QUT BÛ

Balafirên bêmirov a biçek santrala elektrîkê ya bakurê Qamişlo bombe kirin. Di encama êrîşan de li gelek saziyên xizmetguzariyê û taxên Qamişlo û Amûdê elektrîk qut bûn.

Li gorî Daîreya Elektrîkê ya bajarê Qamişloyê, santraleke elektrîkê bi temamî ji xizmetê derket û yek din bi awayekî qismî zerer dît, ji ber vê yekê elektrîk li ser stasyonên Iwêcê û Ceqceq, depoyên genim, aşê Cizîrê, nexweşxaenya Dil û Çav û 6 nexweşxaneyên din, du firne û bi deh hezaran malan qut bû.

Li Amûdê jî stasyona sereke ya navçeyê hat bombekirin, di encamê de elektrîk li ser tevahî saziyên xizmetguzariyê, taxên bajar û gundên wê hat qutkirin.

Gundên Şealê û Zîwana yên Şehbayê û derdora navçeya Til Rifatê bi çekên giran hatin bombebarankirin.  

LI EFRÎNÊ 8 GUND HATIN BOMBERANKIRIN

Artêşa Tirk a dagirker 8 gundên navçeyên Şera û Şêrawayê bi dijwarî bombebaran kir. Gundên hatine bombebarankirin wiha ne: Gundê Mezin, Kilûtê, Soxanekê û Bênê yên girêdayî navçeya Şêrawa ya Efrînê û gundên Merenaz, Şewarxa, Kiştîarê yên girêdayî navçeya Şerayê.