Yekîtiya Ragihandina Azad der barê hedefgirtina nûçegihanê Ajansa Hawarê ANHA’yê Ferhad Yûsif ji aliyê çekdarên El-Nusra û dewleta Îslamî ya Iraq û Bîlad El-Şam daxuyaniyek da. Di daxuyaniyê de Yekîtiya Ragihandina Azad êrîşa li ser nûçegihan û rojnamevanan şermezar kir û şîfa ji Yûsif re xwest.

Daxuyaniya Yekîtiya Ragihandina Azad wiha ye: ‘’Dema ku hevalê me nûçegihanê Ajansa Nûçeyan a Hawarê Ferhad Yûsif ji bo şopandina rastiya bûyerên li Girê Spî  (Til Ebyadê) bû, rastî êrîşa komên çekdar ên Cebhet El-Nusra û dewleta Îslamî ya Iraq û Bîlad El-Şam hat û di encamê de gulleyek ji sînga xwe xwar û parçeyên hawanê li destên wî ketin û di encam de 2 tiliyên wî jêbûn, hevalê me Ferhad rakirin nexweşxaneya Kobanê û li wir tê dermankirin. ᾿̓

Yekîtiya Ragihandina Azad di berdewama daxuyaniya xwe de ev tişt got: ‘’Em hêvî dikin ku di zûtirîn demê de hevalê me Ferhad Yûrif rabe û karê xwe yê rojnamevaniyê bike, em êrîşên çekdarên El-Nusra û dewleta Îslamî ya Iraq û Bîlad El-Şam ên li dijî rojnamevanan şermezar dikin û em bang li saziyên mafên mirovan li Rojavayê Kurdistanê, sazî û rêxistinên navneteweyî dikin xwedî li mafê rojnamevanan derkevin û di zûtirîn demê de ev êrîşên li dijî rojnamevanan li Rojavayê Kurdistanê û Sûriyeyê bi dawî bibin.’’

Di dawiya daxuyaniyê de bang li hemû hêzên çekdar hate kirin ku rêz ji mafên rojnamevanan re bigirin û dema li ser karê xwe bin êrîşî wan nekin.