Şervanê YPG'ê Vedat Sûbaşi (Cûdî Welat) yê di berxwedana Kobanê de jiyana xwe ji dest da, li gundê Kolosok ê navçeya Mûş Dêrxasê cihê lê ji dayik bûye, hat veşartin.

Cenazeyê şervanê YPG'ê Vedat Sûbaşi yê ji Pirsûsê hat wergirtin û anîn Mûşê, ji aliyê bi sedan kesên ku Hevserokê DBP'ê yê Bajêr Cîhan Akpolat, Hevşaredara Gimgimê Sabîte Ekîncî û rêveberên HDP'ê yên Bajêr jî di nav de bûn hat wergirtin û anîn gundê Kolosok ê navçeya Dêrxasê.

Piştî wecîbeyên olî yên li mizgefta gund, girseya gel darbest hilgirt ser milan û ber bi goristana gund ve dest bi meşê kir. Di meşê de posterên Rêberê Gelê Kurd Abdullah Ocalan û wêneyên şervanê YPG'ê Sûbaşi hatin hilgirtin û dirûşmên "Şehîd Namirin", "Bijî Berxwedana YPG'ê" hatin qîrîn.

Cenazeyê anîn goristanê, li ger dirûşme û duayan hat veşartin. Kekê şervanê YPG'ê Sûbaşi Cesîm Sûbaşi piştî veşartinê axivî û banga yekîtî û hevgirtinê kir. Sûbaşi got, "Ez ji her kesên em bi tenê nehiştin re spas dikim. Bila Xwedê vê neheqiyê qebûl neke."

Piştre nûnerê MEYA-DER ê Mûşê Îrfan Kandemîr axivî, bal kişand ser berxwedana Kobanê û got, "Berxwedana Stalîngradê ji bo mirovahiyê bûye xwedî girîngiyeke dîrokî. Bawer bin berxwedana Kobanê jî wê ji bo mirovahiyê dîrokî be."

Piştî axaftinan girseya gel, hat mala Sûbaşi û sersaxiya malbatê kir.