Heyetek ji Meclîsa Dalarnayê ya ser bi Navenda Civaka Demokratîk a Kurd, bi Serokê Partiya Çep (Vanster) a Swêdê ku hevparê hikumetê ye Jonas Sjostedt re hevdîtin kir. Hevdîtin li bajarê Falunê pêk hat.

Mijara hevdîtinê jî hilbijartinên xwecihî yên li Tirkiyeyê, tecrîdkirina Rêberê Gelê Kurd Abdullah Ocalan û çalakiyên greva birçîbûnê bûn.

Serokê Partiya Çep Sjostedt, ji bo şopandina hilbijartinên xwecihî li Wan û gelek bajaran çavdêrî kiribû.

Sjostedt diyar kir, di dema hilbijartinê de ew li gelek deveran geriya û anî ziman, hilbijartin 'di nava şert û mercên antî demokratîk' de pêk hat.

Serokê Partiya Çep got, "Zexteke giran li gel tê kirin", bi taybetî bal kişand ser zextên li çapemeniyê û diyar kir, "Tenê ji bo AKP'ê dixebitîn. Li TV'an bi rengekî yekalî weşan dikirin. HDP boykot dikirin."

Sjostedt ragihand, di dema dengdanê de leşker û polîs hem li nava navenda dengdanê hem jî li derve hebûn û got, "Em jî ji hundir derdixistin. Em rencîde dikirin."

Sjostedt destnîşan kir, HDP temînata aştiyê ye û got, "Lewma Erdogan li dijî HDP'ê derdikeve û li ber polîtîkayên wê radibe. Di nava HDP'ê de hêvî û azadî heye."

Sjostedt bal kişand ser rewşa girtiyên siyasî û got, "Divê girtiyên siyasî hemû tavilê bên berdan." Sjostedt anî ziman, di serî de Hevserokê berê yê HDP'ê Selahattîn Demîrtaş ew girtina siyasetmedaran qebûl nakin û got, "Ji bo mohra terorê ya li ser PKK'ê bê rakirin em hewl didin. Divê Abdullah Ocalan bê berdan. Eger wê aştî bê Tirkiyeyê, divê bi Kurdan re li hev bikin û ji bo aştiyê jî divê Kurd azad bin."

Sjostedt got, "Divê Abdullah Ocalan azad bibe" û destnîşan kir ku di vê mijarê de nêrîna wan eşkere ye.

Sjostedt destnîşan kir, dema ku Kurd azad bûn wê aştî û demokrasî bê û got, "Piştgiriya me wê bidome."