Parlamenterê HDP'ê yê Rihayê Omer Ocalan, ji bo karibe biçe Îmraliyê ku Rêberê Gelê Kurd Abdullah Ocalan bibîne, serî li Wezareta Edaletê da. Omer Ocalan got, tecrîda li Îmraliyê ketiye rewşeke krîtîk.
Parlamenterê Partiya Demokratîk a Gelan (HDP) ê Rihayê Omer Ocalan, ji bo karibe Rêberê Gelê Kurd Abdullah Ocalan bibîne serî li Wezareta Edaletê da.
'REWŞ KRÎTÎK BÛYE'
Serlêdana Omer Ocalan a li Wezareta Edaletê wiha ye:
"Apê min Birêz Abdullah Ocalan ku li Girtîgeha Tîpa T a bi Ewlekariya Bilind a Îmraliyê girtî ye, ji 27'ê Tîrmeha 2011'an û vir ve nikare parêzerên xwe bibîne û ji 11'ê Îlona 2016'an û vir ve jî destûr nayê dayin ku malbat biçe dîtina wî. Ji 21'ê Tîrmeha 2016'an û vir ve 1. Dadgeriya Înfazê ya Bûrsayê bi hinceta Rewşa Awarte pêşî li mafên wî yên bingehîn digire. Şandin û wergirtina name, faks, axaftina bi telefonê û hemû rê û rêbazên din ên ragihandinê lê hatine qedexekrin. Ev yek li prensîbên bingehîn ên hiqûqê nayê, li dijî pîvana wekhevî, qedexeya cihêkariyê, sûdwergirtina ji alîkariya hiqûqî ya parêzeran û li dijî pîvanên mafên mirovan ên girtî û hikumxwaran e. Ji bo pêşî li hevdîtina bi Ocalan re bê vekirin, li girtîgehan grevên birçîbûnê dest pê kirin û pêvajo krîtîk bûye. Ji ber vê yekê, bi navê malbatê em dixwazin di demeke kin de rê li hevdîtina bi Abdullah Ocalan re bê vekirin."
