Bi armanca jinûve avakirina Kobanê li Cenevreyê konferansek pêk hat. Nivîskarê Rojnameya Le Monde Cheterîan, got ku yekane hêza li Rojhilata Navîn mafê mirovan, azadî û demokrasiyan diparêze Kurd in û got: “Divê piştgirî ji bo berxwedana li Rojava bê dayîn.” Hevseroka PYD’ê Asya Abdullah jî daxwaz kir ku divê ji bo vekirina korîdora sivîl zor li Tirkiyeyê bêkirin.

Konferans li salona Zanîngeha Cenevreyê (Université ouvrir Genevoise) pêk hat. Hevseroka PYD’ê Asya Abdullah, Parlamenterên partiya Sosyalîst Carlo Sommaruga, nivîskarê Ermenî yê rojnameya Le Monde ya Dîplomatîk Vicken Cheterian û Kurd û Swîsreyî beşdar bûn.

Sînevîzyoneke ji Kobanê hat nîşandaN. Moderatoriya konferansê parêzer Olîvîer Peter kir. Destpêkê nivîskarê Le Monde, Cheterîan axivî.

CHETERÎEN: AVAKIRIN BERPIRSYARIYA HEMÛ KESÎ YE

Cheterîan got ku  li Rojhilata Navîn li dijî hovîtiyê, Kurd şerekî mezin didin û got: “Şerê li Kobanê tenê gelê wir eleqedar nake. Di avakirina jinûve ya Kobanê de her kes berpirsyar e. Ez Rojhilata Navîn baş dizanim. Piştî şerê li wir, mirov bi çi re rû bi rû hatin, ez baş dizanim. Ez tiştên li Kobanê baş dizanim û divê bi Kurdan re bikevin piştevaniyê.”

KURD JI BO MAFÊN GERDÛNÎ TÊDIKOŞIN

Cheterîan di berdewamiyê de da zanîn ku gelê Kurd li Rojhilata Navîn ji bo hemû mafên gerdûnî û di serî jî bo azadî û demokrasiyê têdikoşe û diparêze. Cheterîan da xuyakirin ku divê ji bo berxwedan li Rojava tê dayîn piştgirî bê dayîn û got ku tiştên îro li Rojava tên jiyîn dişibin qirkirina Ermeniyan.

SOMMARUGA: DIVÊ HER KES JI BO KURDAN BIKEVIN TEVGERÊ

Parlamenterê Partiya Sosyalîst Carlo Sommaruga jî got: “Divê îro avakirina Kobanê peywira her kesî be.  Ez ji bo avakirina Kobanê bang dikim. Modela Rojava ya ku Kurd dixwazin li Rojhilata Navîn bikin jiyanê, ji bo gelên herêmê girîng e. Bi Peymana Lozanê re Kurdistan tine kirin. Piştî Şerê Cîhanê yê Yekem Kurdistan li 4 parçeyan veqetandin. Kurd her tim di nava têkoşînê de bûn. Divê Tirkiye dest ji helwesta xwe berde û korîdorên sivîl veke.”

ABDULLAH: LI KOBANÊ NIRXÊN MIROVAHIYÊ HATIN PARASTIN

Hevseroka PYD’ê Asya Abdullah jî  got ku DAIŞ’ê hewl da Kobanê bixîne, lê YPG û YPJ’ê pêşî lê girt û got: “Têkoşîna li Kobanê hat dayîn ji bo hemû mirovahiyê wateyek mezin dide. Li Kobanê tenê Kurd nehatin parastin, hemû nirxên mirovahiyê hatin parastin. Li Rojava hîna şer didome.  Li herêmên girêdayî Kobanê û Cizîrê şer didome. Hewcedarî bi gelek tiştî heye.  Avakirina Kobanê gelek girîng e. Niha 50 hezar mirov vegeriyane Kobanê. Hewcedariya gel ji derve tê. Lê di ketin û têketinan de pirsgirêk derdikevin. Divê ji bo vê zor li Tirkiyeyê bê kirin ku korîdor bê vekirin.”