Li paytexta Awûstûrya Viyanayê, bi pêşengiya Komeleya Jinên Kurd avahiya Neteweyên Yekbûyî ya li Viyanayê danê vê sibehê hat dagirkirin.

Tevî tedbîrên tund ên ewlekariyê jî çalakger ketin hundirê avahiyê û wêneyên mirovên di êrîşên dewleta Tirk de jiyana xwe ji dest dan, wêneyên xaniyên ji ber van êrîşan xera bûn û pankartên bi nivîsa "Terorîst Erdogan", "Ewropa bêdeng e, Tirkiye qetil dike" hilgirtin. Kurdistaniyên li dijî dewleta Tirk dirûşmê diqîriyan, wêneyên Rêberê Gelê Kurd Abdullah Ocalan hildan û ala PKK'ê vekirin.

Kurdistaniyan bi rayedaran re hevdîtin kirin û ji bo vekirina korîdora alîkariyê ya lezgîn a ji bo 'jêrzemîna wehşetê' ya li Cizîrê bang li rayedaran kirin, ku bikevin nava tevgerê. Kurdistaniyan ji bo rakirina dorpêçî û bidawîkirina komkujiyan dosyayek pêşkêşî rayedaran kirin û daxwazên xwe yên ji bo azadiya Rêberê Gelê Kurd Abdullah Ocalan bilêv kirin.

Rayedarên dosya wergirtin soz dan ku ew ê dosyayê lêkolîn bikin û gavên pêwîst biavêjin. Li ser vê yekê çalakî bi dawî bû.