19 partî û rêxistinên civakî yên sivîl ên ku Înîsiyatîfa Femînîst, Partiya Çepgir, Komîteya Jineolojiyê, Jinên Ciwan ên Azad, Yekîtiya Jinan a Sara, Komîteyên Rojava û Federasyona Ciwanên Syndîkalîst (SÛF) jî di nav de, êrîşên çeteyên DAÎŞ’ê û yên dewleta Tirk ên li dijî Efrîn û Rojava hatin şermezar kirin.

Çalakî di saet 13.00’an de li Qada Marîatorgetê hate lidarxistin. Li vê derê Lînda Svensson axivî û diyar kir ku Rojava herêma herî aştîxwaz a cîhanê ye, lê ji ber vê taybetiya xwe DAÎŞ û dewleta Tirk êrîşî Efrînê kirine.

Piştre li ser navê Yekîtiya Jinan a Sarayê Ayşe Goktepe axivî û diyar kir ku pergala li Rojava pergaleke femînîst e û jin di her qada jiyanê de tevlî avakirin û rêveberiyan dibin.

Li ser navê SÛF’ê jî Karîna Persson axivî û got, “Em pergala demokratîk a Rojava ji bo vê derê jî dixwazin. Em dixwazin ji dêvila mêran pergaleke wisa hebe ku jin me biparêzin.”

Jinan piştre dest bi meşê kirin û li Parka Tantoyê seyranek lidarxistin. Dem bi dem bi stran û sirûdan govend hate gerandin û slogan hatin qîrkirin ên ku piştgiriya Tevgera Azadiyê ya Kurdan dike.