Kongreya Demokratîk a Gelan (HDK) civîna xwe ya çaremîn a meclîsa giştî ya serdema heyştemîn li avahiya navendî ya li Stenbolê pêk anî. Pankarta bi nivîsa "Azadî ji Hevberdevkê me Onûr Hamzaoglû re" li salona civînê hate daliqandin. Hevberdevka HDK'ê Gulîstan Kiliç Koçyîgît di destpêka civînê de axivî û şehîdên Rojiya Mirinê ya 14'ê Tîrmehê Hayrî Dûrmûş, Kemal Pîr, Alî Çîçek û Akîf Yilmaz bi bîr anî. Koçyîgît destnîşan kir ku têkoşîna berxwedêrên 14'ê Tîrmehê îro jî sedema hebûna wan e.

Koçyîgît diyar kir ku bi sîstema nû re meclîs tevizî ye û parlamenter jî bûne mîna noteran. Koçyîgît bi dewamî got, "Ji bo me ya girîng demokrasiya radîkal e, avakirina meclîsên gel e. Mixabin Tirkiyeyê demokrasiya xwe ya parlamenter ku kêm jî be hinekî hebû, bi destê xwe tasfiye kir û monarşiyeke nû ava kir."

Gulîstan Kiliç Koçyîgît işaret bi desteya wezîran kir û got, desteya wezîran nîşan dide ku welat wê bi mejiyê şîrketekê were birêvebirin. Koçyîgît got, ne ji desteya wezîran ne jî hikumetê, demokrasî, wekhevî û azadî nayê vî welatî.

'LI DIJÎ FAŞÎZMA TUND, PÊWÎSTÎ BI TÊKOŞÎNÊ HEYE'

Hevberdevka HDK'ê nerazîbûn nîşanî biryara dadgeriyê da ku serkêşê mafyayê Sedat Peker ê gef li akademîsyenên aştîxwaz xwaribû beraat kir. Koçyîgît got, "Mafyayekî bi navê Sedat Peker ji aliyê dadgeriya vî welatî ve hate parastin. Hevberdevkê me yê dilovan Onûr Hamzaoglû ji ber ku daxwaza aştiyê kir, bi mehan e li girtîgehê dîlgirtî ye. Ji bo serkêşekî din ê mafyayê jî rapora tenduristiyê hate dayin û maf jê re hate dayin ku bi awayekî bê sînor karibe hevdîtinan bike. Ev yek radixe pêş çavan bê hiqûq çiqasî binpê bûye. Li hemberî me bêhiqûqiyeke çawa heye? Li ser Birêz Ocalan ê li Girtîgha Îmraliyê tecrîdeke giran heye ku destûr nayê dayin parêzer û malbata xwe bibîne. Ji bilî hevdîtineke malbatê, ji 5'ê Nîsana 2015'an û vir ve agahî ji Ocalan nayê girtin. Li ser tenduristî û ewlekariya wî em nikarin agahiyê jê bigirin."

Gulîstan Kiliç Koçyîgît da xuyakirin ku ji bilî têkoşîna li dijî faşîzma tund, rêyeke din li ber wan nîne.

Koçyîgît bal kişand ser nîqaşên derbarê îdamê û got, ev yek wê di heman demê de li ser girtiyên siyasî jî bê ferzkirin. Koçyîgît ji bo rûniştina 19'ê Tîrmehê ya Hevberdevkê HDK'ê Onûr Hamzaoglû û siyasetmedarên din banga tevlîbûnê kir.