Kurdistaniyên li Rûsyayê dijîn, li şehîdgeha PKK’ê ya li herêma Yaroslavlê merasîmeke bibîranê li dar xistin. Merasîm bi pêşengiya saziyên Kurd ve li goristana şehîd Tayhan û Şehîd Cehat bi beşdarbûna Kurdên li Moskova, Yaroslavl, Nîjnî Novgord û gelek herêmên din dijîn, pêk hat. Nûnerên Tevgera Jinên Kurd (TJNK), Federasyona Bakurê Sûriyeyê ya Rûsya, Yekîtiya Saziyên Civaka Kurd a Navnetewî û Rêxistina Civaka Êzidî ya Rûsyayê beşdarî merasîmê bûn. Li ser navê malbatên şehîdan jî 2 malbatên ji Bakurê Kurdistan û Ermenîstanê beşdarî merasîmê bûn.

BERXWEDAN HATE SILAVKIRIN

Serokê UKTKB Arîf Azmanî axivî û got bi saya Rêberê Gelê Kurd Abdullah Ocalan û şehîdan, Kurdên li Rûsyayê dijîn  careke din ji nû ve dayîk bûn.

Nûnerê Federasyona Bakurê Sûriye ya Rûsyayê Reşad Benava jî qala destkeftiyên Kurdan û Rojava kir, berxwedana Efrîn û Kobanê jî silav kir.

Li ser navê Tevgera Jinên Kurd BDT, seroka Organîzasyona ‘Viyan’ a Jinên Kurd ên li Moskovayê Tera Qadir axivî û got pêwîstiya gelê Kurd di vê demê de bi yekîtiyê heye. Qadir bi bîr xist ku  azadiya Ocalan rojeva wan a sereke ye.

Serokê Rêxistina Civaka Êzidî ya Rûsya Agît Şamoyan jî axivî û wiha got; “Hemû kes li gorî pêdiviyên xwe ji bo welatê xwe alîkariyek biçûk bike wê Kurdistan bigihêje azadiyê.”