Meş ji kolana Bişara El-Xûrî dest pê kir, ber bi navenda Neteweyên Yekbûyî ve herikî û li qada Riyad El-Silih rawestiya. Meşvanan wêneyên Rêberê Gelê Kurd Abdullah Ocalan, alayên YPG/YPJ/TEV-DEM′ê hildan û bi dirûşmeyan tecrîda li ser Ocalan şermezar kirin.

Li qadê deqeyekê rêz hate girtin,  daxuyaniya çapemeniyê ji aliyê  Endamê TEV-DEM′ê Elî Qamişlove hate xwend.

Di daxuyaniyê de wiha hat gotin: ″Zêdeyî 18 salan e ku Rêberê Gelê Kurd Abdullah Ocalan di zindanê de li hember faşîzma Tirk li ber xwe dide. Rêbertî rastî gelek cureyên êşkenceyê tê û ji hemû mafên xwe ku di belgeyên navneteweyî de hatine destnîşankirin, bêpar maye. ‫

Rayedarên Tirk destûr nadin parêzer û malbata Ocalan ku serdana wî bikin. Sedema vê yekê ew e ku Tirkiyê ditirse ku di encama têkîliyê bi Ocalan re doza Kurd were çareserkirin.

Ocalan avakerê projeya demokrasiyê ku li ser bingeha biratiya gelan û neteweya demokratîk hatiye hûnandin. AKP′ê tecrîdê li ser Rêbertiyê ferz dike, lê nikare rê li pêşiya belavbûna felsefeya wî bigire. Sîstema Federal li Bakurê Sûriyeyê bi ser dikeve û planên AKP′ê têk diçe.

Em tecrîda li ser Ocalan şermezar dikin û bang li civaka navneteweyî û rêxistinên mafên mirovan dikin ku li hember vê dozê xwedî helwesteke mirovî bin û kiryarên AKP′ê sînordar bikin.”

Piştre çalakvanan dirûşmeyên ″Şehîd namirin″, ″Kûjer Erdogan″ û dirûşmeyên ji bo azadiya Ocalan berz kirin.