Kurdên li herêma Elegezê ya Ermenistanê, têkildarî rewşa Rêberê Gelê Kurd Abdullah Ocalan daxuyaniyek dan.

Daxuyanî li gorî dema herêmê saet di 13:00 de li ser rêya navneteweyî ya li navenda Elegezê hate dayin.

Di daxuyaniyê de îdîayên vê dema dawiyê yên li ser jiyana Rêberê Gelê Kurd Abdullah Ocalan hatin bibîrxistin û hate gotin, "Em gelê Rêberê xwe ne. Rêbertî ji bo me xeta sor e. Bila kes sebra me neceribîne... Divê tavilê parêzer û malbat karibin bi Rêbertî re hevdîtinê bikin. Em bang li Neteweyên Yekbûyî, saziyên mafên mirovan û civakî, her wiha bang li CPT dikin ku bi erka xwe rabin."

Di daxuyaniyê de hate ragihandin ku heta rewşa Ocalan zelal nebe wê çalakiyên xwe dewam bike.

Ji bo meş û mîtînga 19'ê Adarê ya li navenda paytext Erîvanê jî banga tevlîbûnê hate kirin.