Hevserokê KONGRA GEL Remzî Kartal, hewldana darbeya leşkerî ya duh rû da, ji ANF'ê re nirxand.

Kartal da xuyakirin, ku hewldanên bi vî rengî wê pirsgirêkên li Tirkiyeyê çareser nekin û got, "Li Tirkiyeyê, ji xwe darbeya sivîl dest daniye ser rêveberiyê. Erdogan, vîna gel a di hilbijartinên 7'ê Hezîranê de derket holê tine hesiband. Medya, dadgerî û parlament tevizand û bi rêbazeke rêveberiya darbeyê, Tirkiye xist nava hilbijartinên 1'ê Mijdarê. Bi vê darbeyê xwe ji nû ve kir desthilatdar."

'LI DIJÎ DARBEYA SIVÎL A ERDOGAN HAT KIRIN'

Kartal diyar kir, ev darbeya leşkerî li hemberî darbeya sivîl a Erdogan hatiye kirin û axaftina xwe wiha dewam kir: "Bêguman yekane rêya çareseriyê ya pirsgirêka Kurd û hemû pirsgirêkên Tirkiyeyê, afirandina rewşek ji vîna gel, azadî û demokrasiyê ye. Heta ku azadî û demokrasî serdest nebe û vîna azad a gel dernekeve pêş, wê bi darbeyên siyasî û leşkerî pirsgirêkên Tirkiyeyê çareser nebin û krîza civakî ya heyî nikaribe ji holê were rakirin. Li hemberî vê hewldana darbeya leşkerî, divê Erdogan û yên pê re tevdigerin weke hêzeke demokrasiyê neyên nîşandan."

'ÇARESERÎ, TÊKOŞÎNA DEMOKRASIYÊ YE'

Hevserokê KONGRA GEL Remzî Kartal li dijî darbeyên leşkerî û sivîl bang li gelan kir, ku têbikoşin û got, "Alîgirên azadî û demokrasiyê, dijberên faşîzm û darbeyên leşkerî û sivîl, divê vîna gelên Kurdistan û Tirkiyeyê xurt û mezin bikin. Girîng e kes ji vê armancê şaş nebe. Çareserî, Erdogan û tifaqa wî ya darbeya sivîl nîne. Çareseriya bingehîn, xurtkirina eniya demokrasiyê ya yekbûyî ya gelan e. Çareserî, ne darbeya sivîl a Erdogan e, ne jî hewldana darbeya leşkerî ye. Çareserî rêya sêyemîn a gelên Kurdistan û Tirkiyeyê ye, yanî têkoşîna demokrasiyê ye."