Hevseroka KCD'ê û Parlamentera HDP'ê ya Colemêrgê Leyla Guven ku desthilatdariya AKP'ê dest danî ser parlamenteriya wê, ji bo balê bikişîne ser bûyerên li Tirkiyeyê diqewime nameyek ji lîderên siyasî yên Ewropî re şand.
Leyla Guven a HDP'î ji serokên Parlamenta Ewropa û Komîsyona Ewropayê, Nûnerê Bilind ê Polîtîkaya Derve ya Yekîtiya Ewropayê û gelek lîderên siyasî yên Ewropayê re nameyek şand. Di nameyê de bal kişand ser zext û zordariyê ku dema dawî zêde bûye.
Guven got, "Desthilatdariya siyasî ya li Tirkiyeyê ku her otorîter dibe, bi krîmînalîzekirina KCD'ê ku îradeya civaka sivîl e û destwerdana li qada siyasî, xisarê li têkiliyên navbera Tirkiye, Ewropa û welatên herêmê dike." Guven di vê mijarê de nêrînên xwe parve kir.
Name ji Serokê Parlamenta Ewropayê Davîd Sassolî, Seroka Komîsyona Ewropayê Ûrsûla von der Leyen, Nûnerê Bilind ê Yekîtiya Ewropayê Josep Borrel, Sekretera Giştî ya Konseya Ewropayê Marîja Bûrîc, Serokê Meclîsa Parlamenteran a Konseya Ewropayê Rîk Daems, Serokên Komên li Meclîsa Parlamenteran a Konseya Ewropayê, lîderên Komên li Parlamenta Ewropayê, Konseya Ewropayê, Nûnerên Mafên Mirovan ên Neteweyên Yekbûyî, Yekîtiya Navbera Parlamentan û nûnerên gelek saziyên Ewropayê re hate şandin.
