Li Fransayê derdora 20 kesên ji Rojavayê Kurdistanê giliyê generalê berê yê Sûriyeyî Esad El Zûbî kirin. Zûbî ku ji artêşa Sûriyeyê reviya, yek ji wan fîguran e ku weke 'mûxalefetê' dihate pêşkêşkirin.

Rojavayiyan bi rêya parêzer Antonin Pechard xwestin, Zûbî ji ber 'pesindayina sûcên şer û qirkirinê', 'sorkirina tundiyê li dijî kes an jî komekê ji ber kok an jî netewetiya xwe' bê darizandin. Ji ber van sûcan li Fransayê ji salekê heta 5 salan cezayê girtîgehê dikare bê birîn.

Generalê berê Zûbî di peyama xwe de hem pesnê Saddam Huseyîn dida, hem jî qirkirina Kurdan rewa dikir û ji ber nerazîbûna mezin neçar ma peyama xwe jê bibe. Dema ku qala PYD'ê jî dikir ji bo Kurdan digot, 'Bexçeyê heywanan e' û peyameke wiha weşandibû: "Ji bo mirov jê rizgar bibin pêwîstî bi dermanê kêzikan nîne, tenê tiştek pêwîst e; ew jî gotina navê Saddam e. Dema ku ev hemû heywan ji nû ve derketin holê, çav li Saddam digere. Bila ruhê wî şa be."