HDP di çarçoveya xebatên xwe yên hilbijartinê yên li Ewropayê de her hefte çalakiyên nû li dar dixe. Duh ji bo Kurd û Tirkên li herêma Lorraîne dijîn, şeva piştevaniya bi HDP’ê re pêk hat.û namzetên Mêrdînê Mîthat Sancar beşdarî bernameyê bû.

Bi sedan kesên li bajarên Saînt Avold, Mezt û Nancy a herêma Lorraîn a Fransayê dijîn, di şeva ku Navenda Civaka Demokratîk a Kurd, Navenda Çanda Elewî ya Metz û Mizgefta Selahattîn Eyyubî de hat organîzekirin de, hatin cem hev. 

Seroka Giştî ya ESP’ê Sultan Ulusoy di şevê de axaftinek kir û bang kir ku divê dengên me ji bo AKP’ê neçin û got ku divê zimanê aştiyê derkeve pêş. Ulusoy destnîşan kir ku hilbijartinên 7’ê Hezîranê ji bo bidawîbûna şerê bi salane didome, derfeteke û bi lêv kir ku her dengek girînge.

SANCAR: HER DENGEK TEMÎNATA JIYANA NÛ Û AŞTIYÊ YE

Namzetê Mêrdînê yê HDP’ê Mîthat Sîncar jî da xuyakirin ku AKP di dema hilbijartinan de zemînek tirsê diafirîne û provokasyonan pêk tîne û got: “AKP bi saya provokasyonan mirovan diçewisîne û hewl dide hilbijartinan qezenc bike. Sozên ku berê hatibûn dayîn jî nehatin cih.”

Sancar bal kişand ser hewldanên Rêberê Gelê Kurd Abdullah Ocalan ên ji bo aştiyê û got ku Ocalan mîmarê aştiyê ye û wiha berdewam kir: “Ji bo aştiya gelê Kurdistan û Tirkiyeyê, Ocalan  girîng e û ger em bixwazin aştiyeke mayîn de pêk bê divê em piştgiriyê bidin vê têkoşînê.”

Sancar bal kişand ser xeyalên Erdogan ên serokatiyê jî û wiha pêde çû: “Di hilbijartinên 7’ê Hezîranê de dengên we jî girîng in.  Her dengê hûn bidin temînata jiyana nû ye. Hedefa me ya hilbijartinê ev e ku cîhanek aştîyane û bê şer bê avakirin.”

Xebatên hilbijartinê yên Lorraîn bi lez û bez didomin.

Di çarçoveya xebatên hilbijartinê yên Saînt Avold û derdora wê de, komîsyona hilbijartinê ya ji 25 kesî pêk tê, xwe gihand hezar û 500 kesî. Di xebatan de hedef ev e ku herî kêm xwe bigîhînin 2 hezar kesî. 
Li bajarê Metz û derdora wê  ji aliyê Navenda Civaka Demokratîk, Navenda Çanda Elewî ya Metz û Yekîtiya Elewiyên Anatolyayê ve xebat tên meşandin. Heta niha xwe gihandine 700 kesî û hedef ev e ku herî kêm bi hezar û 500 kesî re hevdîtinê bikin.