Komeke faşîst, êrîşî avahiya HDP'ê ya navçeya Antalya Serîkê kirin. Koma nîjadperest a êrîşî avahiya ku berî du rojan hatibû vekirin kir, gefa "Ya hûn ê buroyê bigirin û tabelayê daxînin an jî em ê tabelayê daxînin û avahiyê bidin ber agir" xwar.

Li Antalyayê komeke nîjadperest a ji sed kesî pêk dihat, êrîşî avahiya HDP'ê ya navçeya Antalya Serîkê kir.  Koma êrîşkar saet di 22.00’an de hatin avahiyê, gefa "Ya hûn ê buroyê bigirin û tabelayê daxînin an jî em ê tabelayê daxînin û avahiyê bidin ber agir" xwar û avahî dan ber keviran. Rêveberên HDP'ê yên navçeyê yên hatin avahiyê û kesên derdorê, nerazîbûn nîşanî  êrîşê dan. Li ser nerazîbûnan koma êrîşkar neçar man vekişe. Dora avahiyê bi ekîbên polîs û jendermeyan hat dorpêçkirin. Koma nîjadperest a careke din li herêmê civiya, li nerazîbûna HDP'yiyan rast hat. Hevseroka HDP’ê Zarîfe Atîk, namzetê HDP’ê Denîz Yildirim û her wiha Qeymeqamê Serîkê û Midûrê Midûriyeta Polîsan hatin cihê bûyerê.  Qeymeqamê Serîkê ji hevseroka HDP’a navçeyê re got; herêma Serîkê cihekî hesas e, ji ber vê yekê divê partî bê girtin, tabela bê daxistin.’ Denîz Yildirim nerazîbûn nîşanî vê da û got ku ewlehiya xebatên partiyê, peywira qeymeqamtiyê ye û  ew wê avahiyê negirin.

Atîk jî axivî û diyar kir ku ji ber polîs û jendermeyan mudaxaleyê koma êrîşkar nekirine, alozî berdewam kiriye.

Hevserokê HDP'ê yê navçeyê Huseyîn Dakak jî got ku provokasyona li Agiriyê pêk hatiye îro li Serîkê tê plankirin û  hestiyariya gel provokasyon vala derxistiye.

Girseya heta derengiya şevê li ber avahiya navçeyê sekinî, ber bi sibehê ve belav bû û rêveberên HDP’ê jî giliyê êrîşkaran kirin.