Dr. Dario Azzelli ku bi eslê xwe ji Îtalyayê ye, lê li Elmanyayê ji dayik bûye, lê mezin bûye û li bin sîwana gelek zanîngehên welatên Latîn Emerîkayê û DYE'yê gelek karên zanistî kiriye, heta niha bi taybetî li ser xwerêveberiyê, tevgerên civakî, çîna karker gelek pirtûk û gotar nivîsî ye.

Pirtûkên Dr. Dario Azzellini yên bi navê "Futbolistas Futbol û Latîn Emerîka"," Dîroka Alternatîf a Kedê" û "Nikarin me temsîl bikin" bi zimanê Tirkî hatine wergerandin. Ji bo Dr. Dario Azzellini pênaseya "Analîstê hemdem ê herî girîng ê xwerêveberiya karker" tê kirin. Dr. Azzellini ku niha li Zanîngeha Cornell a li DYE'yê wezîfedar e, sala 2019'an piştgirî dabû kampanya nivîskarên naskirî ya ji bo Rêbreê Gelê Kurd Abdullah Ocalan.

'BERJEWENDIYÊN ABORÎ HER TIM DANE PÊŞ'

Dr. Azzellini ku di heman demê de fikir û berhemên Rêberê Gelê Kurd jî nas dike, têkildarî tecrîda li Îmraliyê û bêdengiya welatên rojavayî ji ANF'ê re axivî. Dr. Azzellini ragihand, Ewropayê pêwendiyên bazirganiyê yên bi Tirkiyeyê re timî daniye pêşiya mafê mirovan û got, "Niha ew wezîfe dane ku penaberên li Tirkiyeyê dûrî Ewropayê bêne hiştin."

Dr. Azzellini destnîşan kir ku ji bo aştiya li Kurdistan, Tirkiye û herêmê Ocalan xwedî roleke diyarker e û anî ziman, azadiya Rêberê Gelê Kurd bi tena serê xwe gelekî girîng e. Dr. Azzellini diyar kir, bi vê yekê re wê samimiyeta li ser xwestina çareseriya rêyên siyasî ya şer û aloziyê bê nîşandan û got, "Lê xuya ye Tirkiye ne alîgirê çareseriya aştiyane ye."

'TÊKOŞÎNA KURDAN ŞAŞ TEXMÎN KIRIN'

Zanyarê Siyasetê Dr. Dario Azzellini ragihand, ku dewleta Tirk a modern bi rêya qirkirinê li ser tekkirina civakê ava bûye û bib îr xist ku tecrîda li Îmraliyê bi rengekî girankirî dewam dike, hema bêjin saleke ku agahî ji Rêberê Gelê Kurd nehatiye wergirtin.

Dr. Azzellini got, "Ocalan dîlgirtiyekî dewleta Tirk e. Hewl didin wî bi saxî veşêrin û bêdeng bikin. Bi rêya vê yekê jî dixwazin fikrekî welê belav bikin ku rabûna li ber desthilatdariya Tirk bi kêr nayê. Lê belê em dibînin ku Tirkiye têkoşîna gelê Kurd a ji bo mafên xwe gelekî şaş fêhm kiriye. Bi girtina Abdullah Ocalan re hesabê wê yekê kirin ku tevgera Kurd wê biqede. Lê belê rewşeke berevajî afirî. Niha jî Tirkiye ji ber ku xwe nade ber çareseriya siyasî, Abdullah Ocalan bernade. Ji ber ku tirse, bi azadiya Abdullah Ocalan re dînamîka ku biafire wê rê li ber çareseriya siyasî veke."