Dayikên /Mirovên Şemiyê ji bo aqûbeta xizmên xwe yên di bin çavan de hatine windakirin û qetilkirin bipirsin û ji bo darizandina faîlan, cara 1020’an li Qada Galatasarayê hatin ba hev.

Gelek parêzvanên mafan beşdarî çalakiya Dayikên Şemiyê bûn. Dayikan qurnefîl û wêneyên xizmên xwe hildan. Di çalakiya vê hefteyê de ji bo 11 gundiyên ku di sala 1993’yan de li navçeya Pasûr a Amedê di bin çavan de hatine windakirin, daxwaza edaletê hate kirin.

Ji dayikên Şemiyê Nuray Çevîrmen bi bîr xist ku di navbera 8’ê Cotmeh-25’ê Cotmeha 1993’yan de li navçeya Pasûr û hin gundikên girêdayî Mûşê 11 gundî di bin çavan de hatin windakirin.

Nuray Çevîrmen got: “Çend sal derbas dibin bila bibin; em ê ji bo Mehmet Salih Akdenîz, Celi Azîz Aydogdu, Behçet Tutuş, Mehmet Şerîf Avar, Hasan Avar, Bahrî Şîmşek, Mehmet Şah Atala, Turan Demîr, Abdo Yamuk, Nusreddin Yerlîkaya, Umît Taş û hemû windayên xwe dest ji lêgerîna edaletê bernedin.”