Li gorî daxuyaniya Wezareta Edaletê der barê Asaînov de îdîaname hate amadekirin. Asaînov welatiyê Emerîkayê ye, bi eslê xwe ji Kazakistanê ye û tê gotin ku di nava çeteyên DAÎŞ'ê de sekvan bû. Asaînov wê ji sûcên perwerdekirina çeteyên DAÎŞ'ê û peydakirina lojîstîkê ji DAÎŞ'ê re bê darizandin û tê xwestin ku heta dawiya temenê xwe di girtîgehê de bê hiştin.

Tê gotin ku Asaînov di dawiya sala 2013'an de ji mala xwe ya li Brooklynê derket û di ser Tirkiyeyê re xwe gihand DAÎŞ'ê.

Li gorî îdîanameyê Asaînov di nava DAÎŞ'ê de sekvan bû û weke Suleyman El Amrîkî û Suleyman El Kazakî dihate naskirin.

Asaînov Tîrmeha derbasbûyî li Bakurê Sûriyeyê ji aliyê hêzên QSD'ê ve hatibû girtin û radestî Emerîkayê hatibû kirin.

Tê texmînkirin ku ji Emerîkayê derdora 80 kes tevlî DAÎŞ'ê bûne. Heta niha 6 ji wan ên li Sûriyeyê hatin girtin ji bo darizandinê radestî Emerîkayê hatin kirin.