HDP’ê îdîayên ku tê gotin wê heyetek ji Desteya Rêveber a Navendî ya HDP’ê biçe Qendîlê û banga agirbesteke yekalî bike derewand. Berdevkê HDP’ê Bîlgen got ku ya pêwîst e atmosfera bi pevçûn bisekinîne hikûmet e.
Berdevkê HDP’ê Ayhan Bîlgen, têkildarî pêşveçûnên di rojevê de civîneke çapemeniyê li dar xist.
Bîlgen anî ziman ku HDP wê xebatên xwe yên aştiyê zêde bike, her rêyê nîqaş û biceribîne. Bîlgen wiha dewam kir: "Gotina di Desteya Rêveber a Navendî de heyetek hatiye avakirin, wê biçe Qendîlê û banga agirbesta yekalî bike spekulasyon e.”
'RAWESTANDINA PEVÇÛNAN WEZÎFEYA HIKÛMETÊ YE'
Bîlgen anî ziman nêzîkatiyên têkildarî aştiyê divê rast û encamgir bin. Bîlgen diyar kir ku ya mafê jiyanê bixe garantiyê û dawî li pevçûnê bîne hikûmet e.
Bîlgen diyar kir ku ji bo atmosfera bi pevçûn bi dawî bibe weke HDP li ser hikûmetê çêkirina zextê, berpirsiyariya wan a li hember hilbêjiran e û wiha axivî: “Qendîlê nêrîna xwe û bê wê aştî çawa çêbibe bi raya giştî re parve kir. Divê gelên Tirkiyeyê bi helwestên xwe piştgiriya aştiyê bikin û vê xwesteka xwe jî xurttir bikin. Divê hikûmet polîtîkayên xwe li ber çavan re derbas bike. Em dixwazin dîsa bînin bîra wan ew tişta rakirine sarincê mafên mirovan, demokrasî û xwestekên aştiyê ne.”
Bîlgen da xuyakirin ku plana wan ev e bi tevlîbûna tevahî parlamenterên xwe “civîna komê” li bajarê pevçûn lê zêde çêbikin.
