Berxwedana li navçeya Xelfetî ya Rihayê  yali dijî desteserkirina şaredariyê hat destpêkirin, mezin dibe. Çalakvanên ku di roja 4’an a çalakiyê de hatin pêşiya şaredariya di bin dorpêça polîsan de, bi Hevşaredarên Xelfetiyê Saniye Bayram û Mehmet Karayilan, parlamenterên Partiya Wekhevî û Demokrasiyê ya Gelan (DEM Partî) Ferît Şenyaşar, Ayten Kordu, Hevşaredarên Pirsûsê Ayten Kaya û Muslum Baran, Hevşaredarê Curnê Reşê Serhan Paydaş û Hevşaredarê Wêranşarê Bedriye Yorgun re li kolanan meşiyan.

‘GEL REJÎMA QEYÛMÊ QEBÛL NAKIN’

Di çalakiyê de gelek caran dirûşmeyên “Xelfetî neraze, xwedî li îradeya xwe derkeve”, “Qeyûm wê biçe, em ê bimînin”, “Bijî berxwedana Xelfetî” ve “Jin jiyan azadî”  hatin berzkirin.

Hevşaredarê Wêranşarê Bedriye Yorgun di çalakiyê de axivî û diyar kir ku polîtîkayên qeyûmê darbeya li dijî mafê siyaset û rêvebirina jinan e û wiha got: “Qeyûm zarok û ciwanan bêpêşeroj dihêle. Qeyûm darbeyeke sivîl e. Gel rejîma qeyûmê qebûl nakin û wê qebûl nekin. Em ê bi ser bikevin. Gelê Xelfetiyê di 31’ê Adarê de îradeya xwe hilbijart. Kurd û Tirk jiyana hevpar hilbijartin.” Yorgun bang li hemû aliyan kir ku li dijî qeyûman rabin.”

‘QEYÛM DIZ E, LI ŞAREDARIYÊ DIZ HEYE’

Hevşaredar Bedriye Yorgun got: “Qeyûm diz e, li şaredariyê diz heye.” Hevşaredar Mehmet Karayilan jî vê hişyariyê kir, “Bila her kes bibihîze diz hatiye navçeya me; derî û pacên xwe bigirin.”

Çalakvanan bi dirûşmeya “Xelfetî neraze, xwedî li îradeya xwe derkeve” heta pêşiya rêxistina DEM Partî ya navçeyê meşiyan.