Fermandariya Yekîneyên Berxwedana Şengalê (YBŞ) li ser êrîşa hewayî ya artêşa Tirk a li Şengalê, ku doh pêk hat, daxuyaniyek weşand.

Di daxuyaniyê de hate gotin, "Dewleta tirk ya dagirker û qirker ev hefteyek bû li ser qada me tevgera balafirên xwe yên bi çek û bê mirov zêdekiribû. Di encama vê tevgera wan a hewayî de roja 29`ê Tebaxê wesayetek hêzên me ya foca 80’emîn armanc kir û li hemberî vê wesayeta me êrîşek pêk anî. Di encama vê êrîşa hewayî de 2 hevalên me yên ku li ser erkên xwe bûn birîndar bûn."

'DEWLETA TIRK A DAGIRKER BAŞ ZANE ÊDÎ DAWIYA WÊ HATIYE, LEWMA ÊRÎŞÎ GELAN DIKE'

Daxuyaniyê wiha dewam kir:

"Dewleta Tirk ya dagirker û qirker bi salane dixwaze tevahiya gelên herêmê û gelên Rojhilata Navîn qir bike û xwe li ser giştî herêmê serwer bike. Li ser vî esasî li hemberî gelan êrîşên dijî exlaq û mirovahiyê pêk tîne. Ji zarokên hêj nû hatinê dinê heyanî mirovên 70 salî tevahiya dike armanc û êrîş dike. Komkujî û fermanan pêk tîne. Dikuje, talan dike. Van êrîşên xwe jî li ber çavên hemû cîhanê pêk tîne. Lê mixabin li hemberî van êrîşên dewleta Tirk a dagirker her kes ker û lal maye. Ev jî piştgiriya wan dewletan a ji bo dewleta qirker şênber dike. Hebûna xwe li ser qetilkirina gelan dibîne dixwaze ser vê yekê temenê xwe berdewam bike. Di vir de jî dewleta Tirk a dagirker û qirker jî baş dizane êdî dawiya wan hatiye lewma bi vî rengî êrîşê gelan dike.

'DEWLETA TIRK DIXWAZA TOLA DAÎŞ'Ê JI ŞENGALÊ HILÎNE'

Bi taybetî li hemberî civaka me ya Êzidî û gelên herêmê bê navber di pozîsyonekê êrîşkar de ye û bi şêwazên cûda êrîşê me dike. Ev êrîşên wan ne tenê roja me ya îro de pêk tên. Bi taybetî piştî ku li Şengalê DAÎŞ hat binxistin şûnde bi rengek şênber dixwaze tola DAÎŞ'ê ji gelê me bigire. Bi vê helwesta xwe ve ji roja fermanê heyanî roja îro bi rêbazên tirsonek, bê exlaqî û dijî mirovahiyê gelê me û pêşengên me yên ku li hemberî DAÎŞ'ê serketin bi dest xistine dike armanc û şehîd dike. Bi taybetî di meha Tebaxê de van êrîşên xwe li hemberê civaka me ya Êzidî pêk tîne, bi van êrîşan jî dixwaze tirsandin, bê îrade hiştin, civaka me vegerîne rewşa koletiyê û bê nasnametî hiştinê pêş bêxe. Ji êrîşên xwe ên li hemberî Mam Zekî heyanî Seîd Hesen, Nexweşxaneya Sikîniyê û ya Behrewa armanca wan ev e. 

Bi taybetî ev çend salên dawiyê ji Bakurê Kurdistanê bigire heyanî Rojhilat, Başûr, Iraq, Rojava, Mexmur û Şengalê bê navber û bi hovane êrîş dike. Van êrîşên xwe jî ji bona xwe weke serketineke didin diyarkirin. Sond û ehdan dixwin ku wê van êrîşên xwe dewam bikin. Kîjan rojên wan ê qaşo serketinê ne di salvegera wan de êrîşên bêbext pêk tînin. Ji vê yekê jî tê xuyakirin, komara Tirk hemû serketinên xwe li ser xwîna gelan ava dike.

'DIVÊ GELÊ ME JI DAGIRKERÎ Û QIRKERIYÊ RE BÊJE BES E'

Ji ber ku plana qirêj daye pêşiya xwe bi awayek heya jê tê hemû destketiyên tevgera azadiyê dide ber xwe. Ji bo wê jî divê di serî de civaka me û tevahiya gelên herêmê bi çalak bin helwestên xwe bi hêrseke mezin raber bikin. Divê gelê me ji bo dagirkerî û qirkeriyê re bêje bes e. Divê êdî rê ji bo dagirkeriyê neyê dayîn ku xwe li ser xwîna ewladên vî gelî dilşad bike. Divê edî rê ji bo xiyanet û xwefiroşan re neyê dayîn û hesabê mezin jê were xwastin.

'EM PARÊZVANÊN GELÊ XWE NE, AMADE NE DI VÊ OXIRÊ DE HER BERDÊLÊ BIDIN'

Em parêzvanên gelê xwe ji bo parastina nirx û pîroziyên civaka xwe berdêl çi dibe bila bibe ji bo dayînê em amade ne. Me ev di roja fermanê de jî raber kir û em ê ji îro şûnde jî raber bikin. Ji ber ku ferman û komkujî ji Bakurê Kurdistanê heyanî Rojava, Zaxo, Mexmûr, Kerkûk û Şengalê ji hev ne qûtin. Êrîş ser tevahiya gelane. Ser tevahiya axa Iraqê ye. Ji bo wê jî divê di serî de gelên herêmê bi tifaqiyeke mezin ve li hemberî vî dijminê xwîn xwar rabin û rê neyê dayîn ku kesek vê axa pîroz dagir bike. 

'HETA KÊLIYA DAWÎ EM Ê LI HEMBERÎ DAGIRKERIYÊ LI BER XWE BIDIN Û TÊKOŞÎNÊ MEZIN BIKIN'

Em di serî de ji bo her du hevreyên xwe yên birîndar û ji malbatên wan re şîfa dixwazin. Em soza xwe ya parastin û tolgirtinê di şexsê tevahiya şehîdên xwe de û şehîdên komkujiyan de bi mezintirîn dubare dikin. Em ê heyanî kêliya dawî ya jiyana xwe li hemberî her cûre êrîşên dagirkeriyê ber xwe bidin û emê têkoşîna xwe mezintir bikin. Di oxira wê de çi dibe bila bibe ji bo têkoşînê em ji doh bêhtir amade û bi hêz bin."