Rojnamevan Denîz Firat (Leyla Yildiztan), di 8’ê tebaxa 2014’an di dema êrîşên DAÎŞ’ê yên li ser Wargeha Penaberan a Şehîd Rûstem Cûdî (Mexmûr) de şehîd bibû. Firat, li ser gora xwe ya li Taxa Xecxatûn a navçeya Ebex a Wanê hate bibîranîn. Merasîma bîranînê ji hêla Platforma Rojnamegerên Jin a Mezopotamyayê (MKGP) û Komeleya Rojnamegeran a Dîcle Firatê (DFG) ve hate organîzekirin. Xizmên Firat û hempîşeyên wê tev li merasîma bîranînê bûn.

Merasîm bi deqeyek rêzgirtinê dest pê kir û piştre jî nûçegihana JINNEWS’ê Rojda Aydin axivî. Aydin got ku Denîz Firat ji bo Çapemeniya Azad bû sembolek û got: “Heta di dema êrîşên DAÎŞ’ê de jî Denîzê dev ji pênûsa xwe berneda. Weke Çapemeniya Azad em ê xwedî li mîrasa wê derkevin û di rêya wê de bimeşin.”

Hevserokê DFG’ê Serdar Altan jî anî ziman ku Denîz Firat li hemberî tarîtiya DAÎŞ’ê afirandî, ronahî derxist holê û ev tişt got: “Heke em îro hêj wê têkoşînê bidomînin, ev bi saya wan e. Di wan rojên reştarî de got; ‘ez ê dev ji kameraya xwe bernedim’ û heqîqet nivîsand. Dema em li têkoşînên şoreşê yên cîhanê dinihêrin, dibînin ku gelek rojnameger di dema şopandina nûçeyan de hatine qetilkirin. Lê belê şopandina nûçeyan a Denîz Firat pir cuda bû. Ji bo hemû çapemeniya cîhanê û Çapemeniya Azad bû mînakek.”

Kekê Denîz Firat, Seyat Yildiztan jî anî ziman ku ji bo wan girîng e ku hempîşeyên xwîşka wî xwedî lê derdikevin û ev tişt anî ziman: “Ji ber têkoşîna wê em her tim serbilind in. Piştî Denîz şehîd bû, pênûsê wê li erdê nema. Xwîşka wê û hevalên wê ketin rêya wê. Weke malbata wê em xwedî li nirxên xwe û têkoşîna Denîz Firat derdikevin û piştgiriyê didin. Denîzê tu carî serî netewand, em jî dê serî netewînin û dê li ber xwe bidin.”

Di dawiya merasîma bîranînê de jî beşdaran qurnefîl danîn ser gora Firat.