Rêber Apo di 4'ê Nîsana 1949'an de li gundê Amara yê navçeya Xelfetî ya Rihayê ji dayik bû. Gelê Kurd û Gerîlayên Azadiyê yên Kurdistanê her sal rojbûna Rêberê xwe pîroz dikin. Sê endamên Koma Awazê Çiya jî bi wesîleya 4'ê Nîsanê hem stran gotin hem jî hestên xwe bi me re parve kirin.

Xebat: 4'ê Nîsanê di şexsê Rêber Apo de li hevrêyan hemûyan, gelê Kurdistanê, gelên Rojhilata Navîn û hemû gelên bindest pîroz be. Gelek sedemên xwe hene ku îro ji aliyê bi milyonan mirovî ve tê pîrozkirin. Dibe ku weke gotineke klasîk bê fêhmkirin, lê belê ev roj rojbûna şexsekî bi tenê nîne. Rojbûna gelekî, rojbûna bi milyonan mirovî ye. Gelek sedemên vê hene. Rêbertî ji bo gelê Kurd tê wateya rizgariya ji mirinê. Ji ber vê yekê roja ku Rêbertî birin Îmraliyê ev pirs hatibû kirin: 'Gelo bi milyonan mirov di nava hucreyekê de dikare bê ragirtin?' Ev yek heqîqeta Rêbertî nîşan dide.

Di navbera Rêber Apo û gelê Kurd de her tim têkiliyeke kûr a manewî hebû. Ev têkilî ti carî qut nebû û hîn xurt bû. Bİ taybetî di 4'ê Nîsanê de ev têkilî gihîşt asta herî bilind. Beriya rabûna Rêber Apo dema ku mirov bala xwe didin ser Kurdistanê û Rojhilata Navîn ji bilî şer, kaos, mirin, rijandina xwînê û êşê tiştekî nabîne. Lê belê bi rabûna Rêber Apo re rewş guherî. Ji ber vê yekê gelê Kurd ji dil xwedî li Rêber Apo derdikeve. Ji ber vê yekê rojbûna Rêber Apo weke rojbûna gelêw Kurd tê qebûlkirin. Dibe ku ev pênase teng jî bimîne, lê belê em dikarin bibêjin ku rojbûna hemû gelên bindest e.

Rêbertî pirsgirêka Kurd pênase kir û diyar kir ku gelê Kurd bi qirkirina çandî re rû bi rû ma. Rabûna Rêber Apo tê wateya raperîna li dijî qirkirinê. Rêbertî di axaftineke xwe de digot, 'Dema ku min dengê Aram bihîst, min ji xwe re got divê ev deng winda nebe'. Ev gotin pênaseyeke çandê ye. Ev yek bi muzîkê, bi dengê dengbêjekî, bi gelek tiştan dikare xwe îfade bike. Ev gel gelê Rêber Apo ye. Jİ ber vê yekê wateya 4'ê Nîsanê gelekî kûr e. Li ser vê bingehê 4'ê Nîsanê di serî de li Rêber Apo, li hemû hevrêyan, gelê Kurdistanê û gelên Rojhilata Navîn pîroz be.

BI TAYBETÎ JIN Û CIWAN DIVÊ XWEDÎ LI 4'Ê NÎSANÊ DERKEVIN

Hedar: Ez jî bi germahiya Newrozê 4'ê Nîsanê li gelê me, li gelên bindest û hevrêyan pîroz dikim. Çawa ku Newroz bi rengînî, coş û tîna agir hate pêşwazîkirin, divê 4'ê Nîsanê jî bi heman rengî bê pêşwazîkirin. Ji ber ku weke ku hevrê Xebat jî got, em vê rojê tenê weke roja rojbûna şexsekî nabînin. Bi rastî jî hebûna Rêbertî hebûna me afirand. Bi hebûna Rêbertî re em bi hebûna xwe hesiyan. Lewma ev rojbûn bi taybetî tê wateya rojbûna gelê Kurd û gelên bindest. Ji ber ku di rastiya Rêbertî de gelên bindest ên cîhanê û Rojhilata Navîn têne temsîlkirin. Lewma em dikarin bibêjin 4'ê Nîsanê rojbûna mirovahiyê ye, roja pîrozbahiyê ye.

Bi taybetî jin çawa ku bi rengê xwe, bi coşa xwe pêşengî ji pîrozbahiyên Newrozê re kirin, bi heman dengî divê bi deng, rengê xwe tevlî 4'ê Nîsanê bibin, pîroz bikin.

Yên ku herî zêde divê xwedî li 4'ê Nîsanê derkevin jin in. Çima? Ji ber ku Rêbertî her tim di silavên xwe de, di peyamên xwe de berpirsyariyên mezin dide jinan. Û yên ku herî zêde xwedî li van bangan derdikevin, di vê xetê de jiyanê ava dikin, pêşengiyê ji her qadê re dikin jin in. Lewma em ji pêkanîna azadiya fîzîkî ya Rêber Apo berpirsyar in. Em dikarin 4'ê Nîsanê bikin azadiya fîzîkî ya Rêbertî. Weke jin divê em hîn bêhtir xwedî li Rêber Apo û 4'ê Nîsanê derkevin. Careke din 4'ê Nîsanê li jinan, tevahiya civakê û hevrêyan pîroz dikim.

Yilmaz: Me îsal 8'ê Adarê û Newroz bi coşeke mezin pîroz kirin. Bi rastî jî li çar parçeyên Kurdistanê û derveyî welat bi coşeke mezin hatin pîrozkirin. Niha jî em 4'ê Nîsanê pîroz dikin. Hêvî dikin ku çawa 8'ê Adarê û Newroz bi coş hatin pîrozkirin, 4'ê Nîsanê jî bi heman ruhî bê pîrozkirin. Bi taybetî erka ciwanan e. Divê ciwan hemû xwedî li banga Rêber Apo derkevin. Rêber Apo felsefeyeke nû ye, jiyaneke azad e. Rêbertî dibêje, 'Me bi ciwantî destpê kir, em ê bi ciwantî bi ser bikevin'. Divê haya ciwanan ji vê mîsyon û wezîfeya xwe hebe. Ez jî vê rojê destpêkê li Rêber Apo, li gelê me û hevrêyan pîroz dikim, serketinê dixwazim.