HDP di hilbijartina Adara 2019’an de bi ser ketibû. Bi hinceta ku namzetên HDP’yî KHK’yî ne,namzetiya HDP’yiyan hatibû betalkirin û Salîh Akman ên AKP’yî bûbû şaredarê Tûşpayê. Şaredariya Tûşbayê hatiye asta ku nikare çopan jî berhev bike.

Bi taybetî dora Sîteya Xeratan û Kerestevanan di nav çopê de maye. Qutiyên çopê ligel ku tijî bûne jî çop nayên berhevkirin.

Fikara şêniyan ev e ku ji ber çopê nexweşî belav bibe.

Esnafên Tûşbayê diyar kirin ji bo ku tîfo belav nebe divê tevdîr were stendin û gotin “Heke çareserî neyê dîtin em ê dest bi çalakiyên berdana kar bikin.”

Deriyê Sînor a Kapikoy ya di bin kontrola Şaredariya Serayê jî di nav çopê de maye. Şaredariya Serayê jî di destê qeyyûm de ye. Vî deriyê sînor ji aliyê AKP’ê 7 caran hatibû girtin û 7 caran jî hatibû vekirin. Li deriyê sînor bi tenê lavaboyek jî tune.

Li deriyê sînor her roj bi sedan kes diçin û tên. Esnaf diyar dikin heke çareserî çênebe ew ê nikaribin bazirganiyê bikin.