Li navenda Amedê  serê vê sibehê polîsan avêt ser gelek malan. Polîsan li malan lêgerîn pêk anî û alavên malan serûbin kirin. Diyar bû ku polîsan di serdegirtina malan de gelek kes destgîr kirine. Lê heta niha navê destgîrbûyiyan diyar nebûye.
 
Polîsan avêt ser mala Halîse Akosy a ku cenazeyê lawê wê endamê HPG’ê Egît Îpek di nîsana 2020’an de bi pakêta kargoyê jê re hatibû şandin. Tevî ku Halîse Aksoy ne li malê bûye jî polîsan li malê lêgerîn pêk aniye û eşyayê malê belav kirine. Di kêliya lêgerînê de polîsan ji keça Halîse Aksoy ev pirs kirine: “Dayika te tenê li malê dimîne? Kes tê û diçe mala wê? Gelo ev parfûm li vir çi dike? Gelo dayika van pirtûkan dixwîne?” 
  
Xwişka Egît Îpek da zanîn ku polîsan di lêgerîna de pirsa birayê wê jî jê kirine û got: “Min ji wan re got dewletê cenazeyê wî bi kargoyê ji me re şand. Ma hûn vê jî nizanin?” 
 
Polîsan nêzîkî saetekê li malê lêgerîn pêk aniye û dest danîne ser hin pirtûkan û nameyek Halîse Aksoy û ji malê derketine û çûne.