Malbatên 34 kesên ku di 28’ê Kanûna 2011’an de li gundê Roboskiyê ji ber bomberdûmana balefiran jiyana xwe ji dest dabûn, di hefteya 307’emîn a komkujiyê de daxwaza edaletê kirin. Malbatên Roboskiyê li ser gora zarokên xwe hatin ba hev û daxuyaniyek dan. Li ser navê malbatan Serokê Roboskî-Der’ê Velî Encû axivî yê ku komeleya wan bi Biryarnameyên di hukmê qanûnan de (BHQ) hatibû girtin. Encû ji bo kesên ku di erdheja li Başûr û Rojhilatê Kurdistanê jiyana xwe ji dest dane, sersaxî xwest.

Encû bal kişand ser parvekirinên nijadperest ên li tevnên civakî hatine parvekirin û got: “Em van kesên nijadperest şermezar dikin. Vê helwesta wan ti carî nayê qebûlkirin.”

Encû diyar kir ku ew ê têkoşîna wan bidome û got: “Ev 6 sal in em li ser gora zarok û birayên xwe têkoşîna edaletê dimeşînin. Ew ê vê têkoşîna me ya li hemberî bêedaletî û bêhiquqîyê heta dawiyê berdewam bike.”