Li gor amarên sendîkayê herî zêde binpêkirinên li dijî rojnamevanan li Hewlêrê pêk hatiye.

Sendîkaya Rojnamevanên Kurdistanê li ofîsa xwe ya li Hewlêrê bi civînek çapemeniyê rapora xwe ya hejmar 31 û 32 ya salane ya li ser binpêkirinên mafan yên li dijî rojnamevanan eşkere kir.

Seroka Komîsyona Parastina Rojnamevanan a  Sendîkaya Rojnamevanan Nezaket Hisên, rapor xwend û diyar kir ku di sala borî de 62 bûyerên binpêkariyên mafan li beramberî 128 rojnamevan û saziyên çapemeniyê rû dane. Nezaketê got ku  ji van amaran diyar dibe ku binpêkirinên li beramberî rojnamevanan berdewam dikin.

BINÇAVKIRIN, ASTENGÎ, CIHÊKARÎ, ÊRÎŞ Û GEF...

Nezaket Hisên diyar kir di sala 2023’yan de 128 binpêkirin li beramberî rojnamevan û saziyê çapemeniyê pêk hatine. Ji van 14 bûyerên binçavkirin û ragirtina rojnamevanan, 25 bûyerên astengî û cûdakariyan ên di dema weşanê de ne. 11 bûyerên êrîşkirin û heqaretkirina li rojnamevanan û 3 bûyerên gefxwarina li rojnamevanan rû dane.

Nezaket Hisên di berdewamiya axaftina xwe de got  ku di sala borî de 6 bûyerên desteserkirin û şikandina kelûpelên rojnamevanî, 2 bûyerên lêdana rojnamevanan û bûyerek ya serdegirtina saziyên çapemeniyê hatine tomarkirin.

Li gor raporê, sala borî li Hewlêrê 19 bûyerên binpêkirina li beramberî rojnamevan û saziyên çapemeniyê pêkhatine û di rêza yekem de cih digre, piştî wê Dihok bi 14 bûyerên binpêkirinê di rêza duyem de cih digre. Piştî wê jî Silêmanî bi 12 bûyeran, Kerkûk 5 bûyer, Îdareya Soran 6 bûyer, Helebce 3 bûyer, Îdareya Germiyan 2 bûyer û Îdaraye Zaxo 1 bûyer cih digrin.

Di raporê de tê diyarkirin ku li gor rapora komîsyona parastina azadî û mafên rojnamevanan, sala borî tenê binpêkirin li beramberî rojnamevanên mêr pêk hatine û tu binpêkirinên li beramberî rojnamevanên jin nehatine tomarkirin.

Di dawiya raporê de jî tê diyarkirin ku li nava saziyên ragihandinê de jî binpêkirin li beramberî rojnamevanan tê kirin û wiha hat gotin: “Carna rêveberê saziyê henekê xwe li rojnamevanan dike, di dayîna destûr û mafan de cûdakarî tê kirin. Wekî din binpêkirinên wek,  Sivgahîkirin û bêrêzîkirina li rojnamevanan, nebûna dewreyên perwerdê, derxistina ji kar, kêmaniya heqê karkirinê di beramberî saetên kar dike û nehesibandina salên ku xizmetê dike hene.”