Cografyaya Kurdistanê ku biberbûna xwe li cîhanê navdar e, ji ber polîtîkayên şer ên dewleta Tirk nema ber dide. Yek ji wan gundan ku ji ber bêxwedîtiyê bax û baxçeyên wê hişk bûn, fêkiyên hinar, hejîr û gelek fêkiyên din bi darê ve hişk bûne jî gundê Hîzûwê yê Heskîfa Êlihê ye. Bax û baxçeyên Kurdistaniyên ku ji ferzkirina cerdevaniyê ya dewleta Tirk qebûl nekirin û gundê xwe berdan, ji ber bêxwedîtiyê hişk bûn.

Gundiyekî ku ji ber ewlehiyê nexwest navê xwe bide, got li gundê Hîzûwê ew bi hev re yek bûne ê piştî pergala cerdevaniyê gelek gundî ji bêgavî gundê xwe berdane. Gundî got, ‘’Ez ji zaroktiya xwe ve li vir im û min qet xaka xwe berneda’’. Gundiyê Hîzûwê got, li gel hemû zext û zordariyan jî wan cerdevanî qebûl nekiriye.

‘VEGERIN SER GUNDÊ XWE’’

Gundiyê ku navê xwe nedayî got bax û baxçeyên gundiyên ku ji ber zext û zordariyan gundê xwe berdane hişk û ziwa bûne, ji ber bêaviyê nikarin gelek beran biçenini û got, ‘’Me ji vî rezê hûn dibinin bi topan tirî dida hev, me ji ava tirî dims û basîq çêdikir. Niha tenê rezek e. Hejîrên me, hinarên me û çi tiştên ku me debara xwe pê dikir ji ber bêxweditiyê hişk bûn.’’

Gundiyê ku navê xwe dayî bang li wan gundiyan kir ku gundê xwe ji bêgavî berdane û got, ‘’Em dizanin hûn çi zehmetiyê dikişinin lê her çilo jî be li gundê xwe vegerin, werin ser rez û bax û baxçeyên xwe. Her tişt hişkûhola bû. Bila ax û berên we dîsa şîn bibin. Heke hûn vegerin wê wiha bibe.’’