76’emîn rojbûna Rêber Apo li Awûstûrya, Îngilîstan û Swîsreyê bi çalakiyên curbecur hat pîrozkirin. Çalakî bi deqeyek rêzgirtina ji bo bîranîna şehîdên azadiya Kurdistanê destpê kirin û bi axaftin, muzîk û çalakiyên çandî berdewam kirin.

AWÛSTÛRYA

Graz: Di çalakiya ku bi pêşengiya Komuna Jinê hat lidarxistin de bal hat kişandin ser tecrîda li ser Rêber Apo û rola pêşengiya jin û ciwanan di pêvajoya aştî û civaka demokratîk de. Li baxçeyê NCKD'ê govend hatin gerandin, dirûşme hatin berzkirin û gul hatin çandin.

ÎNGILÎSTAN

London: Di pîrozbahiya ku ji aliyê Meclîsa Gel a Kurd û pêkhateyên wê ve hat organîzekirin de, ciwanan bi dirûşma "Rojbûna te rojbûna me ye" tevlî bûn û şitil hatin çandin.

Nûnerên tevgerên jin û ciwanan axaftin kirin û destnîşan kirin ku 4'ê Nîsanê roja vejîna gelê Kurd e. Çalakiya ku hunermend Memozan derket ser dikê, bi gerandina govendê bi dawî bû.

Liverpool: Di çalakiya ku ji aliyê TCŞ û TekoJIN'ê ve hat organîzekirin, posterê Rêber Apo hate vekirin, belavok hatin belavkirin û dirûşme hatin berzkirin. Çalakî bi pîrozbahiyên li Navenda Civaka Kurd dewam kir.

SWÎSRE

Zurîh: Di çalakiya bi pêşengiya YJK-S'ê de rojbûna Rêber Apo hat pîrozkirin û peyamên aştî û berxwedanê hatin dayîn.

Piştî axaftinan meşeke meşaleyî hat lidarxistin û şitil li gel hatin belavkirin.

Cenevre: Di pîrozbahiya ku ji aliyê Komuna Jinê ya Sema Yuce ve hat organîzekirin de sînevîzyonek hat nîşandan û zarokan kek birîn.

Di çalakiya li vir de bal hat kişandin ser pêşengiya jinan û hat destnîşankirin ku 4'ê Nîsanê roja vejînê ye.

Lozan: Di pêşengiya Meclîsa Jinê ya Lajîn de çalakî bi helbest, çîrok û pêşandana belgefîlman pêk hatin. Çalakî bi tevlîbûna aktîf a zarokan rengîntir bûn.

Di axaftinên di çalakiyan de hat kirin de, hat diyarkirin ku rojbûna Rêber Apo ji nû ve zayîna gelê Kurde û destpêka aştî û civaka demokratîk e. Jin û ciwanan diyar kirin ku ew ê têkoşîna xwe ya ji bo azadiya fîzîkî ya Rêber Apo bidomînin.