Rêxistina Partiya Demokratîk a Gelan (HDP) ya bajarê Amedê bi civînekê namzetên hevşaredariya Bismilê Gulşen Ozer û Orhan Ayaz, namzetên hevşaredariya Bajarê Mezin ê Amedê Adnan Selçûk Mizrakli û Hulya Alokmen Ûyanik bi gel dan nasandin. Parlamenter Dêrsim Dag, Salîha Aydenîz û Îmam Taşçier beşdarî civînê bûn.

Namzetên hevşaredariyê di ketina navçeyê de bi konvoyê hatin pêşwazîkirin û derbasî avahiya HDP’ê ya navçeyê bûn. Gel bi coşeke mezin namzet pêşwazî kirin û dirûşmeyên “Amed ya me ye, Bismil ya me ye” , “Leyla Guven rûmeta me ye” , “Bijî berxwedana zindanan” , “Bi berxwedanê em ê bi ser bikevin” û “Zext nikarin bi me” berz kirin. Namzeta hevşaredariyê Gulşen Ozer gel silav kir û got; “Bi xizmetê em ê layîkî gel bikin. Em ê bi hev re bi ser bikevin.”

Namzet Orhan Ayaz jî bibîrxist ku Leyla Guven û 281 girtî di greva birçîbûnê de ye û got; “Leyla Guven rûmeta me ye. Em ê bi gelê Bismilê re 31’ê Adarê bilêta qeyûm bibirin.”

Namzetê Hevşaredariya Bajarê Mezin ê Amedê Adnan Selçûk Mizrakli jî wiha got; “Sembola serketinê ya gel û netewan yekîtî, hevkarî û piştgirî ye. Her gelê ku yekîtiya xwe ava neke wê hertim dijmin êrîş bike û dibin zextan de bimîne. Îro roj roja yekîtiyê ye. Bijî yekîtiya me, em gel in mafdar in em ê bi ser bikevin.”

Mizrakli balkişand li ser cezayê ku ji bo Gulten Kişadan û Sebahat Tûncel hatî dayîn û got; “Li wir edalet nayê belavkirin. Bingehê edaleta hiqûq nîne. Bingehê zilmê tê danîn. Lê jinek heye ku darizandina sîstema hiqûqê yan wan dike. Em ê şeva 31’ê Adarê şaredariyên ku hatine xespkirin em ê radestî xwediyên wan gel bikin.”

Parlamenter Dêrsim Dag, Salîha Aydenîz û Îmam Taşçier di vegera Bismilê de li pêşiya mala Leyla Guven rawestiyan û silav dan Guvenê.