Ji bo hilbijartina parlamentê ya Başûrê Kurdistanê ku wê 30'ê Îlonê pêk were, hatibû plankirin û îro dema propagandayê dest pê bike. Lê ev pêvajo hate taloqkirin.

'DEMA PROPAGANDAYÊ WÊ 11'Ê ÎLONÊ DEST PÊ BIKE'

Berdevkê Komîsyona Hilbijartinê ya Bilind a Serbixwe ya Herêma Kurdistanê Şêrwan Zîrar diyar kir ku biryar bi piraniya dengan hatiye girtin û wê dema propagandayê 11'ê Îlonê dest pê bike.

Tê gotin ku nakokiyên navbera partiyan bûne sedema vê biryarê.

PDK, Komeleya Îslamî û Nifşên nû beriya niha dabûn xuyakirin ku divê hilbijartin di dema xwe de bê kirin. Koalîsyona Edalet û Demokrasiyê û Koma Zehmetkêşan jî diyar kirin ku ew ne bawer in hilbjiartin di nava rewşeke wekhev de pêk were û ragihandibûn ku wê hilbijartinê boykot bikin.

Tevgera Goran, Yekgirtûya Îslamî û YNK jî dixwazin ku hilbijartin di demeke din de bê kirin. Aliyên din jî bi rê û rêbazê cuda hewl didin hilbijartinê taloq bikin.

111 KURSÎ HENE

Midûrê Daneyan a Komîsyona Hilbijartinê Karwan Celal doh bi daxuyaniyekê gotibû, "Partiyên siyasî û koalîsyonên li Kurdistanê dikarin ji sibe û pê ve dest bi propaganda hilbijartinê ya serdema 5'an a parlamentê bikin."

Ji bo hilbijartina parlamenta Başûrê Kurdistanê ji 31 lîste û koalîsyonan serlêdana 709 namzetan hatiye qebûlkirin.

Li Parlamenta Kurdistanê bi giştî 111 kursî hene.