Li navçeya Hezexê ya Şirnexê vê sibê polîsan bi ser malan de girt. Polîsên tîmên taybet di heman demê de bi ser mala biraziyê Hevşaredarê Hezexê Mûrat Şen ê qeyûm tayînî şûna wî hat kirin, Nûrettîn Şen de jî girt. Hat zanîn ku di serdegirtinê de polîsan çek xist serê Nûrettîn Şen û îşkence lê kirine.

Tîmên taybet kelûpelê malbata Şen serûbin kirin. Bavê hevşaredar Mûrat Şen derxistin derve û li ber sir û seqema dijwar dan sekinandin. Her wiha polîsên tîmên taybet îşkence li dayika Hevşaredar Mûrat Şen, Fatma Şen a 90 salî kirin û dest û milê wê xistin ber sindoqê. Di dest û milê dayikê de birîn çêbûn û wêneyên dayikê ravekirina îşkenceyê radîxîne ber çavan. Polîsan serê Abdurrahîm Şen jî li dîwar xistin û ser û çavê wî birîndar kirin.

Hat ragihandin ku welatiyê bi navê Mehmet Fîdan jî hatiye destgîrkirin.

RIHA

Li taxên Sêwreg, Wêranşar û Hîlwanê leşkerên Tirk girtin ser malan û 16 kes destgîr kirin.

Li Sêwregê 12 kes, li Wêranşarê 3 kes û li Hîlwanê jî kesekî bi navê Salih Yildiz Hocaoglû hate destgîrkirin.