Meş bi pêşengiya Tevgera Azadî û Rêxistina Jinên Azad a Kurdistanê (RJAK) pêk hat.

Meşa ji bo şermezarkirina komploya 15'ê Sibatê ji ber benzînxaneya kevn dest pê kir û heta Parka Baxê Giştî dewam kir. Di meşê de dirûşmên "Bijî Serok Apo", "Bê Serok jiyan nabe" û "Bijî Yekîtiya Neteweyî" hatin qîrîn.

Li Parka Baxê Giştî jî ji bo bîranîna şehîdên azadiyê yên Kurdistanê deqeyek rêz hat girtin û piştre Mihemed Cukil daxuyaniya nivîskî xwend. Cukil got, "Armanca komplokeran dewamkirina peymana Sykes-Pîcot û Lozanê bû. Lê belê di encama berxwedan û têkoşîna gelê Kurd de, pêşî li vê armanca komplokeran hat girtin."

Cukil bal kişand ser çalakiyên Kurdan û dostên wan ên li çar aliyên cîhanê ji bo azadiya Ocalan û got, "Rêber Apo hem weke lîderekî hem jî weke ramangerekî tê dîtin."

Li ser navê Tevgera Azadî jî Nerîman Ehmed peyivî û got, "Wezîfeya her kesî ye ku vê roja reş protesto bike. Divê gelê Kurd li hemû parçeyên Kurdistanê û li her devera lê ne li ber vê roja reş rabe û çalakiyan lidar bixe."

Li ser navê PYD'ê jî Suleyman Abdulqadir axivî û got, "Em ji hemû hêzên azadîxwaz, rêxistinên mafên mirovan û Yekîtiya Ewropayê dixwazin, ku ji bo azadiya Ocalan bikevin nava hewldanên cidî."

Ji Tevgera Goran Bîrwa Resûl jî işaret bi girîngiya azadiya Ocalan kir û got, "Weke Tevgera Goran, em hemû hêzên azadîxwaz ên têdikoşin û her kesên ji bo azadiya Ocalan dixebitin, silav dikin. Bang li hemû partiyên li Başûrê Kurdistanê dikim, ku ji bo azadiya Ocalan bikevin nava hewldanan."