Hevserokatiya Konseya Rêveber a KCK’ê bi wesîleya 8’ê Adarê Roja Jinên Kedkar a Cîhanê peyamek weşand.

Di peyama KCK’ê de ev tişt hate diyarkirin:

“Ji bo azadiya fîzîkî ya Rêberê Gelê Kurd Abdullah Ocalan ê ku bûye dost, heval û hogirê rastîn ê jinan, jinên dinyayê têkoşîn û hewldaneke mezin danîn holê. Em spasiya hemû jinên cîhanê dikin.

Em Tevgera Azadiya Kurdan 8’ê Adarê Roja Jinên Cîhanê pîroz dikin. Bi baweriya bilind a ku wê rizgariya jinan bi xwe re rizgariya hemû bindest û mirovayetiyê pêk bîne, em têkoşîna wan silav dikin û em careke din diyar dikin ku em Tevgera Azadiyê ya Kurdan em ê bi têkoşîna jinan re bin.

MIROVAHÎ DEYNDARÊ JINAN E

Di warê geşbûna civak û mirovayetiyê de cihekî gelekî girîng û sereke ya hest û keda jinan heye. Ji ber ku di xwezaya jinê de civakîkirina jiyanê heye. Heke ne ji ber xwezaya civakîkirina ya jinan bûye, wê geşbûna mirovayetiyê û afirandina nirxan ne pêkan bûya. Di vî warî de hemû mirovayetî ji bo hemû nirxên erênî yên hatine afirandin, deyndarê jinan e. Xwezaya jinê ya ku jiyanê azad dike, wate û nirxekî dide jiyanê, di nava xwe de mêtingeriyê qebûl nake, dibe îfadeya rastîn a jiyana azad û heqîqetê. Ji ber vê jî jiyana azad a herî watedar, rast û azad wê bi azadbûna jinan pêk were, heke îradeya jinê bi awayê herî azad tevlî jiyanê bibe, wê ev tişt pêk were.

Ji ber ku jin jiyanê azad dike û tê de mêtingeriyê pêk nayne, dibe hedefa feraseta mêrserwer a ku di nava wê de desteserkirin û mêtingerî heye. Jin di nava dîrokê de bi zordarî, zext, şîddet, dek û dolaban derxistine derveyî jiyanê û ew kirine mehkûmê mêtingeriyê. Bi çewisandina xwezaya jinê re civakîbûn hatiye paşxistin, di navbera mirovan de ferq, çîn, têkiliyên girêdayîbûnê hatine avakirin, rêya jiyana mêtinger hatiye avakirin. Lê nekarîne têkiliya xurt a jinê ya ku jiyanê geş dike û civakîbûnê ji nû ve hildiberîne ji holê rake, di warê geşbûna mirovayetiyê de xwezaya jinê roleke sereke bi cih aniye.

RIZGARIYA MIROVAYETIYÊ WÊ BI RIZGARIYA JINAN PÊK WERE

Di vê serdemê de pergala modernîteya kapîtalîst di nava dîrokê de bûye lûtkeya êrişên li ser jinê. Pergala modernîteya kapîtalîst civakîbûn ji holê rakiriye, dixwaze jiyanê ji mêtingeriyeke bêdawî veke. Vê nêzikatiya modernîteya kapîtalîst herî zêde li dijî xwezaya jinan e û berevajî taybetiya jinan e ya ku jin jiyanê civakî dikin û wê azad dikin. Ji ber vê pergala modernîteya kapîtalîst berê xwezaya jinê ji mêtingeriyê vedike, xwezaya jinê dike amûrek û wê ji wateya wê ya rastîn dûr dixîne. Pergala modernîteya kapîtalîst zanistê, zanyariyê, hunerê, çandê û hemû tiştên li ser navê mirovayetiyê hatiye avakirin, dike rûpoşa îdeolojîk a ji bo çewisandin û berevajîkirina xwezaya jinê. Ev zordarî, pêkutî, şîddet û mêtingeriyê tê veşartin û ev hemû tişt wekî azadî ne, tên pêşkêşkirin. Lê bi saya bîra jinan û îdeolojiya rizgariya jinan vê rûpoşa îdeolojîk a sixte ya modernîteya kapîtalîst her roj piçekî din dikeve. Têkoşîna azadiya jinan a ku azadiya rastîn û rizgariya wê di derbaskirina modernîteya kapîtalîst de dibîne, xeta xwe ya rastîn dibîne û rêya rizgariya ji mêtingerî, zext û şîddetê vedike. Rizgariya mirovayetiyê wê bi rizgariya jinan pêk were. Em Tevgera Azadiyê bang li mirovayetiyê dikin ku em zêdetir piştgiriyê bidin jinan.

RÊBER APO BÛYE HEVRÊYÊ JINAN

Rêber Apo îdeolojiya rizgariyê ya jinan ava kiriye, bingeha teorîk û felsefîk a azadiyê daniye holê û ji bo azadiya jinan tevkariya herî mezin kiriye. Ji xeynî wê jî ji bo rêxistinbûna jinan û bikaribe bibin îrade û têkoşînê geş bikin jî di her warî de hewldana pratîk nîşan daye. Rêber Apo dema ji jinan re ev derfet ava kiriye, ev tişt daniye pêşiya mêran ku xwe ji têkiliya serwerî, mulkiyet û girêdanê rizgar bikin û li ser xeta azadiyê bikaribin xwe biguherînin û veguherînin. Rêber Apo bûye dost, hevrê û hevalê rastîn ê jinan û bi jinan re li ser bingeha azadiyê kom bûye. Ji bo azadiya fîzîkî ya Rêber Apo jin li her dera dinyayê têdikoşin û pêşengtiyê dikin. Em Tevgera Azadiyê ji ber ku xwedî li Rêber Apo derketine û ji bo azadiya fîzîkî ya Rêber Apo têdikoşin û hewl didin, spasiyên xwe pêşkêşî hemû jinên cîhanê dikin.

ŞOREŞA AZADIYA KURDISTANÊ ŞOREŞEKE JINAN E

Şoreşa Azadiya Kurdistanê hêz û motîvasyona xwe ji rastiya jina azad a ku dibe îrade distîne. Rêber Apo Şoreşa Azadiya Kurdistanê li ser vî bingehî ava kiriye. Ji ber vê jî Şoreşa Azadiya Kurdistanê dibe şoreşa jinan. Rêxistinbûna jinan û geşbûna têkoşîna rêxistinkirî ya jinan, regeza jiyana azad û armanca herî bingehîn a Şoreşa Azadiya Kurdistanê ye.

Bi saya têkoşîna ku jin pêşengiya wê dikin desthilatdariya faşîst a AKP û MHP’ê hatiye asta hilweşandinê. Bi hilweşandina desthilatdariya AKP û MHP’ê, ew ê desthilatdariya faşîst a ku dijminatiya jinan dike ê hilweşe, demokratîkbûna Tirkiye û Rojhilata Navîn û azadbûna Kurdistanê wê pêk were. Bi vê baweriyê em careke din 8’ê Adara hemû jinên dinyayê pîroz dikin, bi baweriya ku wê rizgariya jinan rizgariya mirovayatiyê pêk bîne, em di têkoşîna wan de serkeftinê dixwazin.”