Hevseroka Kongreya Civaka Demokratîk (KCD) Leyla Guven ku 22'ê Çileyê li mala xwe ya li Amedê di dema serdegirtina polîsên Tirk de hate girtin, ji Girtîgeha Tîpa E ya Amedê nameyek şand.

Guven li ser namzetiya xwe ya parlamenteriya Colemêrgê ji Ajansa Mezopotamyayê (MA) re nameyek şand û got, "Ez ji zindana Amedê bi dil û can silavên xwe ji we re dişînim. Em hêz û moralê ji têkoşîn û gelê xwe digirin. Lewma di nava her şert û mercî de em ê vê têkoşîna xwe bidomînin. Li zindanan jî em xwedî biryardarî û berxwedaneke mezin in."

Nameya Guven wiha dewam kir: "Bi salan e li dijî gelê me û vîna wan operasyonên qirkirinê tên kirin. Em dibînin bê rêya siyaeta demokratîk çawa li ber me digirin. Me bi têkoşîna xwe ya mafdar her tim ji bo siyaseta demokratîk û aştiyek bi rûmet helwesta danîn. Desthilata AKP'ê ku 16 sal in li ser kar e, xwîna gelê me û hemû gelên Tirkiyeyê dirijîne. Ji bo em vê desthilatdariya nehiqûq hilweşînin û em nefese bidin gelê xwe, hilbijartinên 24'ê Hezîranê ji bo me firsendek dîrokî ye. Em wek gelên Kurdistan û Tirkiyeyê cudakarî, dualî û yên tune tên hesibandin datînin aliyekî, em ê li ser navê gelên xwe yekîtiyek rêgezî ava bikin û bi kurd, tirk, laz, çerkez, elewî, jin ciwan û kedkaran re bi ruhê 7’ê Hezîranê êdî dema avakirina jiyanek nû û siberojek ronî ye. 
 
Li Colemêrgê namzet nîşandana min ji bo min cihê rûmetê ye. Partiya me min wek namzet wezîfdar kir. Ez ê hewl bidin ku layiqî helwesta bi rûmet a gelê Colemêrgê bibim. Bi vê wesîleyê ez bang li hemû hevrên jin û ciwanên me yên serî netewandin e dikim. Em ji têkoşîna xwe ya mafdar û rêgezên xwe tawîzan nedin. Em ê li gelemperiya Kurdistanê pêşengiyê ji xebatên hilbijartinê re bikin. Em ê bi gel, jin û ciwanên xwe re di vê hilbijartinê de li Kurdistanê bi xurtî bi ser bikevin. Bi vê bîr û baweriyê ez we bi dil û can hembêz dikim."